دوپينگپەن ۇستالعان ايگىلى سپورتشىعا جارىسقا قاتىسۋىنا رۇقسات بەرىلدى

استانا. قازاقپارات - ناۋرىز ايىنىڭ باسىندا دوپينگ داۋىنا ىلىككەن ايگىلى تەننيسشى ماريا شاراپوۆا پاريجدە وتەتىن «رولان گارروس» تۋرنيرىنە قاتىساتىن سپورتشىلاردىڭ قاتارىنا ەندى.

بۇل تۋرالى اقپارات تۋرنيردىڭ رەسمي سايتىندا جاريالاندى دەپ حابارلايدى sn.kz.

بۇگىن دۇنيەجۇزىلىك دوپينگكە قارسى اگەنتتىك (WADA) وكىلدەرى شاراپوۆانىڭ قانىنان تابىلعان 1 ميكروگرام مەلدوني زاتىنىڭ دوپينگ بولۋعا تىم از كورسەتكىش ەكەنىن ايتىپ، ونىڭ جارىستارعا قاتىسۋىنا رۇقسات بەرگەن بولاتىن. اتالعانءاناليزدى تەننيسشى اعىمداعى جىلدىڭ 1- ناۋرىزىندا وتكىزگەن.

ەستەرىڭىزگە سالايىق، 7- ناۋرىز كۇنى ماريا شاراپوۆا جۋرناليستەرمەن كەزدەسىپ، ءوزىنىڭ دوپينگ داۋىنا ىلىككەنىن ايتقان بولاتىن. ول اۆستراليا اشىق بىرىنشىلىگىنە قاتىسقان تۇستا قانىنان مەلدوني زاتىنىڭ تابىلعانىن ايتقان.

الايدا، ءوزىنىڭ پىكىرىنشە، اتالعان پرەپارات ونىڭ اعزاسىنا ميلدرونات دارىسىمەن بىرگە تۇسكەن بولۋى مۇمكىن. ال، ميلدروناتتى سپورتشىلار جۇرەككە ارتىق سالماق سالماۋى ءۇشىن پايدالانادى.

12- ناۋرىزدان باستاپ WADA شاراپوۆانىڭ جارىستارعا قاتىسۋىنا ۋاقىتشا تىيىم سالدى. ال، «رولان گارروس» پاريجدە بيىل 22- مامىردا باستالىپ، 5- ماۋسىمدا مارەسىنە جەتەدى.