ساراپشىلار تەڭگەنىڭ ءالى نىعايا تۇسەتىنىن مالىمدەدى
ال جەكەلەگەن ايىرباستاۋ ورىندارىندا شەتەلدىك ۆاليۋتانى ساتىپ الۋ 330 تەڭگەگە دەيىن ءتۇستى دەپ حابارلايدى «استانا» ارناسى.
ۇلتتىق ۆاليۋتانىڭ بۇلاي نىعايۋىنا قاتىستى ساراپشىلار دا ءتۇرلى پىكىر ءبىلدىردى. ەكونوميست ايۆار بايكەنوۆ، «تەڭگەنىڭ قىمباتتاۋىنا سىرتقى فاكتورلار اسەر ەتتى»، دەيدى.
سوڭعى كۇندەرى مۇنايدىڭ قۇنى ءبىرشاما ارتتى. وتكەن اپتادان بەرى قارا التىننىڭ ورتاشا باعاسى 11-13 پايىزعا وسكەن. بۇل، تيىسىنشە، ەلدە كوك قاعاز قۇنىنىڭ السىرەۋىنە تۇرتكى بولعان. ساراپشىنىڭ پايىمداۋىنشا، ا ق ش ۆاليۋتاسىنىڭ ءبىر كۇندە 5 تەڭگەگە ارزانداۋىنان سوڭ، قىسقا مەرزىمدى بولجامدار جاساۋعا مۇمكىندىك تۋعان.
«ءارى قاراي دا تەڭگەنىڭ نىعايۋنا نەگىز بار دەپ كۇتەمىز. مۇناي باعاسى باررەلىنە 45-50 ا ق ش ۆاليۋتاسى دالىزىندە تۇراقتاسا، قازاقستاندا امەريكا اقشاسىنىڭ ءار بىرلىگى 315-320 تەڭگەگە دەيىن ارزانداۋ مۇمكىندىگى جوعارى. ءبىراق بۇل دا ۇلتتىق بانكتىڭ ساياساتىنا بايلانىستى بولماق. سەبەبى ودان ارى قۇلدىراتۋ دا ءدال قازىر ەل ەكونوميكاسىنا ءتيىمسىز. سەبەبى ۇكىمەت تە جاقىندا بيۋدجەتتى ءار دوللار ءۇشىن 360 تەڭگە مولشەرىندە بەكىتىپ، سول بويىنشا جۇمىس جۇرگىزىپ جاتىر»، - دەيدى ەكونوميست ايۆار بايكەنوۆ.
ال ەكونوميست مەرۋەرت ماحمۇتوۆا مۇنايدىڭ باررەلى 40 دوللاردان جوعارى بولمايدى دەپ بولجايدى. ال ۇلتتىق بانك ءۇشىن دوللاردىڭ كۇرت السىرەۋى ءتيىمسىز دەگەن پىكىر ايتتى.
«بايقاپ وتىرسام، ءبىزدىڭ ۇلتتىق بانك ءتوراعاسى دانيار اقىشيەۆ مىرزا جاقىندا «رەيتەرس» اگەنتتىگىنە سۇقبات بەرگەندە، تەڭگەنىڭ قاتتى كۇشەيۋىنە قارسى بولىپ وتىر. وتكەن ناۋرىز ايىندا ۇلتتىق بانك ۆاليۋتا نارىعىندا دوللاردىڭ ەداۋىر بولىگىن ساتىپ العان. تەڭگە كۇشەيمەس ءۇشىن. سوندىقتان قىسقا مەرزىمدى بولجام بويىنشا، مامىر ايىنا دەيىن دوللار دەڭگەيى 310 عا عانا بارادى»، - دەيدى ەكونوميست مەرۋەرت ماحمۇتوۆا.
