جازىقسىز جىندىحاناعا جابىلعان مارجان تۇرلىبايەۆا جۇرەك تەبىرەنتەر حات جولدادى
قورىتىندى بويىنشا ەندى مارجان قوعامعا قاۋىپتى ەمەس دەپ تابىلعان.
الايدا، رەسپۋبليكالىق ساراپشىلاردىڭ بەرگەن قورىتىندىسىنا وڭتۇستىكتىڭ دارىگەرلەرى مويىنسۇنعىسى كەلمەيتىن كورىنەدى، ويتكەنى سەگىز جىل بۇرىنعى بىلىقتارىنىڭ اشىلىپ قالۋىنان قورقادى دەپ جازادى Baistars.kz.
ءالى دە جىندىحانادان شىعا الماي جۇرگەن قىز تەلەجۇرگىزۋشى جانات باقىتقا جان ايقايمەن حات جازدى. اتالعان حاتتى ءتۇپنۇسقاسىندا نازارلارىڭىزعا ۇسىنىپ وتىرمىز.
- سالەمەتسىزدەر مە! مەن - مارجان تۇرلىبايەۆا، ءالى تۇركىستانداعى يندومدا سوت شەشىمىن كۇتىپ جاتىرمىن. جاقىندا الماتىدا ءبىر اي تەكسەرۋدەن ءوتىپ كەلدىم. ول جاقتا ايتەۋىر «ادىلدىك» بار ەكەن، دارىگەرلەر «سەن سياقتى ساپ-ساۋ قىز نە ىستەپ ءجۇر مۇندا؟» دەپ تاڭ قالدى. تۇگەلدەي تەكسەرىپ، كوز جەتكىزۋ ءۇشىن قيتۇرقى سۇراقتار قويىپ، ادەيى اشۋلاندىرۋعا تىرىستى، ءبىراق بەرىلمەدىم. قۇداي وڭداپ، «جاقسى شەشىم» شىعاردى. «مىنەزىندە تۇراقسىزدىق بار» دەپ جازعان دا بولار، مىنەزىمنىڭ ازداپ قىزبالاۋ ەكەنىن بىلەم، ءبىراق ول ءتۋابىتتى مىنەزىم (سول قىزبا مىنەز ءۇشىن جىندىحاناعا جابا بەرسە، الەمدە ادام قالماس).
الماتىدان شىققاسىن، تۇركىستانعا اياعىم تارتپاسا دا، امال جوق كەلدىم. ءبىراق سودان بەرى 2 ايداي ۋاقىت ءوتتى. بۇل جاقتاعىلار نە ىستەرلەرىن بىلمەي ءالى ءجۇر، مەنىڭ ساۋ ەكەنىمدى راستايتىن قۇجات بەرەيىن دەسە، كوپ ادام جىلى ورنىمىزدان قوشتاسامىز دەپ قورقادى، «جىندى» دەيىن دەسە، ساۋمىن، ءارى الماتىنىڭ قورىتىندىسى بار. شۋلى ىستەن سۋديالار دا ات-توندارىن الا قاشىپ، ءجيى اۋىسادى. وسىلايشا، بوسايتىن كۇنىمدى كۇتىپ وتىرعانىمدا، بۇگىن تۇركىستان پروكۋراتۋراسىنىڭ مىناداي اقپاراتىن وقىپ، ەگىلىپ تۇرىپ جىلادىم. جارالى جۇرەگىمدى ول جەردە وتىرعان پەندەلەر ودان ءارى تىرنادى. پروكۋراتۋرا بىلەم، «وتچەت دەيدى»، «وچكو دەيدى»، سولاردى جيناۋ ءۇشىن باسى بار، اياعى جوق مالىمدەمە بەرە سالادى. ءبىراق مەنىڭ ىشكى جان دۇنيەمدى ويلاپ وتىرعان بىرەۋى جوق!
ادامدار، قاتىگەزسىڭدەر! «مارجان تۇرلىبايەۆاعا قاتىستى قىلمىستىق ءىس جابىلدى!» دەپ جەردەن جەتى قويان تاپقانداي جار سالىپتى! سوندا 8 جىل بويى تارتقان ازابىم، كوز جاسىم قايدا قالدى؟ ارينە، سەندەر ءۇشىن دەتدومنىڭ بالالارى - مۋسور عوي تاستاي سالاتىن. ءبىزدىڭ كوز جاسىمىز سەندەرگە تۇك ەمەس! تەك ارتتارىڭدى عانا ويلايسىڭدار! بىردەمە بولسا «قۇدايدىڭ الدىندا جاۋاپ بەرەدى» دەيسىڭدەر، مەن ايتار ەم، ماعان ىستەگەن ىستەرى ءۇشىن، ءار ازاپتى كۇنىم ءۇشىن جاۋاپ بەرەتىندەر وسى ومىردە دە جازاسىن السىن! انا ومىردە دە جاۋاپ بەرسىن...
شالقىپ جۇرسىڭدەر، ادامدار. مىنا جاقتا 8 جىل ەمەس، 8 ساعات وتىرا الماس ەدىڭدەر. وڭكەي اقىلى اۋىسقان ادامداردىڭ ورتاسىندا... مەنى ورىندارىڭا قويىڭدارشى، تۋعاننان شەشەلەرىڭ تاستاپ كەتەدى، انانىڭ جىلۋىن سەزبەي، جەتىمحانادا جىلاپ ءوستىم. ءسويتىپ جۇرگەندە ون جاسىمدا ءبىر ايەل كەپ «اناڭمىن» دەپ اكەتىپ، ۇيىنە اپارىپ كورسەتپەگەندى كورسەتەدى، اقىرى مەنەن قۇتىلۋ ءۇشىن جىندىحاناعا جاۋىپ تىندى. ءتىرى اكەمدى «اكەڭ جىندىحانادا ولگەن، سەن دە سويتەسىڭ» دەدى. اكەم ءتىرى بولسا، ءولدى دەگەن سپراۆكا جاساتقان با؟ ول دا ساتىلا ما؟ ماسقارا.
مەنىڭ قازىرگى تۋالەتكە تاستالىپ جاتقان بالادان ەش ايىرماشىلىعىم جوق قوي سوندا؟! ول ايەل مەنى شىعارماس ءۇشىن جىلاسا دا، سىقتاسا دا، ءبارىن ىستەپ جۇرگەن بولار، ونى جاقسى بىلەم. انا جۇرەگى جىلىماسا دا، ار الدىندا ءوز-وزىنەن ۇيالماي ما؟ قۇدايدان قورىقپاي ما؟ ون توعىز جىلىم وسىنداي ازاپپەن ءوتتى. التى-اق سىنىپ ءبىلىمىم بار، ماعان ءالى اتتەستات الۋ كەرەك، وقۋ كەرەك، تۇرمىس قۇرۋ كەرەك. ۋاقىت دەگەن زۋلاپ ءوتىپ جاتىر. ال شىمكەنتتەگى «ارتىن» ويلاعاندار ءبىر-بىرىنە سىلتەپ، ءىستى جۇرگىزۋگە، مەنى بوساتۋعا اسىعار ەمەس!
وتىنەم سىزدەردەن، وسى ءىس ءادىل شەشىمىن تابۋ ءۇشىن قوعام بولىپ كومەكتەسىڭىزدەرشى. ادۆوكات، سۋديالاردى، ءوزىمدى «ايتۋعا وڭايعا» شاقىرىڭىزدارشى. بۇگىن اشۋ ۇستىندە اۋديوجازبا جىبەرىپ وتىرمىن جانات اپكەگە. مەنى تۇسىنەسىزدەر دەپ ويلايمىن.
