التاي تاۋىندا جەرلەنگەن كوشپەلى تۇركى ايەلدىڭ قابىرى تابىلدى - فوتو
تابىلعان جادىگەرلەرمەن موڭعول عالىمدارى، حوۆد ايماعى مۇراجايىنىڭ قىزمەتكەرلەرى جۇمىس ىستەۋدە. مۇراجايدىڭ عىلىمي قىزمەتكەرى ب. ءسۇحبااتاردىڭ ايتۋىنشا، ولار موڭعوليا اۋماعىندا، بالكىم كۇللى ورتا ازيادا العاشقى رەت تونالماعان سول كۇيىندە ساقتالعان تۇركىلەرگە تيەسىلى قابىر تاپتى.
بىرەگەي جادىگەرگە الەمنىڭ ءتۇرلى ەلىنەن ماماندار قىزىعۋشىلىق تانىتا باستادى.
الدىن الا باعالاۋ بويىنشا، بۇل التاي اۋماعىندا 1500 جىل بۇرىن تىرشىلىك ەتكەن تۇركى ءتىلدى تايپالاردىڭ ءبىرىنىڭ وكىلى - ايەلدىڭ سۇيەگى بولۋى مۇمكىن. مۇردە كيىزبەن بىرنەشە قاباتتاپ ورالعان. جىنىسىن انىقتاۋ ءۇشىن ماماندار بۇلدىرمەي، كيىزدىڭ وراۋىن جازۋى كەرەك.
«مولا قاراپايىم ايەلگە تيەسىلى. بۇل ايەل دەپ ويلايمىز، سەبەبى ەر ادام ادەتتە، جاۋىنگەر رەتىندە ساداقپەن بىرگە جەرلەنەدى»، - دەدى ءسۇحبااتار.
سۇيەكتىڭ جانىنان عالىمدار ات قاڭقاسىن، جاقسى ساقتالعان ەرتوقىم، جۇگەن، قويدىڭ باسى، جاستىق، سازدان جاسالعان ىدىس، ءشومىش، تەمىر باقىراش، كوشپەندى ايەلگە قاجەتتى زات- مۇلىكتەر جانە ت. ب. تاپتى.
قابىردىڭ 2803 مەتر تاۋ بيىگىندە ورنالاسۋى ونى تونالۋدان قورعاپ كەلگەن، ال دەنەنىڭ مۋمياعا اينالىپ ءارى جادىگەرلەردىڭ بۇلىنبەي ساقتالۋىنا تاۋلى سالقىن كليمات ىقپال ەتكەن.
