الماتىدا جۇرگىنشىلەردىڭ كىناسىنەن بولاتىن جول- كولىك اپاتىنىڭ الدىن الۋ بويىنشا كەڭ كولەمدى شارا قولعا الىندى

الماتى. قازاقپارات - الماتىدا جاياۋ جۇرگىنشىلەردىڭ كىناسىنەن بولاتىن جول- كولىك اپاتىنىڭ الدىن الۋ بويىنشا كەڭ كولەمدى شارا قولعا الىندى.

بۇل تۋرالى بۇگىن الماتى قالالىق ءى ءى د باسپا ءسوز قىزمەتىنەن حابارلادى.

ۇستىمىزدەگى جىلى ءۇش اي ىشىندە الماتى اۋماعىندا 1 مىڭ 167 جول- كولىك اپاتى بولدى. سونىڭ سالدارىنان 38 ادام قازا تاۋىپ، 1397 ادام جارالاندى. ال جاياۋ جۇرگىنشىلەردىڭ كىناسىنەن 17 جول-كولىك اپاتى بولىپ، 7 ادام قازا تاپتى جانە 10 ادام زارداپ شەككەن.

 «بۇگىنگى تاڭدا جەرگىلىكتى پوليتسيا قىزمەتىنىڭ الدىنا ءبىرقاتار باسىمدى جانە كەلەشەكتى مىندەتتەر قويىلدى. سول باعىتتاردىڭ ءبىرى - الماتى اۋماعىندا كولىك جۇرگىزۋشىلەرى مەن جاياۋ جۇرگىنشىلەر اراسىندا جول قوزعالىسى ەرەجەسىن بۇزۋ ارەكەتتەرىن انىقتاۋ جانە وعان جول بەرمەۋ بويىنشا تۇراقتى نەگىزدە شارالار وتكىزىپ تۇرۋ. باستى ماقسات - قالادا جول- كولىك اپاتتارىن ازايتۋ جانە جول قوزعالىسى قاۋىپسىزدىگىن قامتاماسىز ەتۋ»، - دەدى ءوز سوزىندە الماتى قالالىق ءى ءى د جەرگىلىكتى پوليتسيا قىزمەتىنىڭ باستىعى، پوليتسيا پودپولكوۆنيگى جاسۇلان بايكەنوۆ.

شارا اياسىندا جول- پاترۋلدىك پوليتسيا ينسپەكتورلارى جاياۋ جۇرگىنشىلەر وتكەلىنەن ءوتۋ ەرەجەسىن بۇزاتىن، جاياۋ جۇرگىنشىلەرگە باسىمدىق بەرمەيتىن، توقتاۋ جانە كولىكتى اۆتوتۇراققا قويۋ ەرەجەلەرىن ساقتامايتىن كولىك جۇرگىزۋشىلەرىن، سونداي-اق، جولدى بەلگىلەنبەگەن جەرمەن قيىپ وتەتىن جۇرگىنشىلەردى انىقتاۋعا كۇش سالاتىن بولادى. بۇل ءۇشىن قالانىڭ ماگيسترالدىق كوشەلەرىندە قوسىمشا جول- پاترۋلدىك پوليتسيا ەكيپاجدارى جۇمىس اتقارادى.

ايتا كەتەلىك، جاياۋ جۇرگىنشىلەردىڭ قاتەلىگىنەن بولاتىن جول- كولىك اپاتتارىنىڭ الدىن الۋ جانە بولدىرماۋعا باعىتتالعان كەڭ كولەمدى شارا الماتىدا ۇستىمىزدەگى جىلى 12-15- ءساۋىر ارالىعىندا وتەدى.

اۆتور: ايبوتا جاپپاربەرگەن