ريو وليمپياداسىندا قازاقستان تۋىن كوتەرىپ شىعۋعا كىم لايىقتى؟
ازىرگە بۇل مارتەبەنىڭ قاي سپورتشىعا جۇكتەلەتەنىن قوعام قىزۋ تالقىعا سالىپ جاتىر.
ال تانىمال بوكسشى ەرماحان ىبىرايىموۆ ءتورت بىردەي سپورتشىنى ۇسىنىپ وتىر دەپ حابارلايدى 31- ارنا.
تۋدى سەنىپ تاپسىرۋعا لايىق دەلىنگەن سپورتشىلاردىڭ ىشىندە بوكسشىلار مەن دزيۋدو شەبەرلەرى بار. اتلانتا جانە سيدنەي وليمپيادالارىندا قازاقتىڭ بايراعىن كوتەرگەن ەرماحان ىبىرايىموۆ بۇل مارتەبەگە ساي دەپ بىرنەشە سپورتشىنى تاڭداپ قويىپتى. ول ەلباسىنىڭ قولىنان تۋدى سەنىممەن قابىلداپ العاننان كەيىن، تەك جەڭىسپەن ورالۋ كەرەك دەپ سانايدى.
سونىمەن ەرماحان ىبىرايىموۆ ۇسىنعان 4 سپورتشى: بوكستان الەم چەمپيوندارى - دانيار ەلەۋسىنوۆ پەن جانىبەك ءالىمحان ۇلى. لوندون وليمپياداسىنىڭ كۇمىس جۇلدەگەرى ادىلبەك نيازىمبەتوۆ جانە دزيۋدودان الەم چەمپيونى اتانعان تۇڭعىش قازاق بالاسى ەلدوس سمەتوۆ. بوكسشىنىڭ ايتۋىنشا، ولاردىڭ كانديداتۋراسىن ءوزارا داۋىسقا سالۋ كەرەك.
«4 ازاماتتىڭ اراسىندا تارتىس جۇرسە، كىمگە تۋدى بەرەمىز؟ ەندى تۋدى ماعان بەرىڭىز، مەن ۇستايىن دەپ تالپىنىپ تۇرعان سپورتشىنى تابۋ وڭاي بولمايتىن شىعار. ول ۇلكەن جاۋاپكەرشىلىك»، - دەيدى سيدنەي وليمپياداسىنىڭ چەمپيونى ەرماحان ىبىرايىموۆ.
ال 11- وليمپياداسىن كورۋگە دايىندالىپ جاتقان تانىمال سپورت جۋرناليسى نەسىپ ءجۇنىسباي ۇلى ريودا تۋ كوتەرۋگە لايىق ءبىر عانا سپورتشىنى اتادى. دانيار ەلەۋسىنوۆ. ول سوڭعى 4 وليمپيادادا ۇلتتىق قۇراما قورجىنىنا ءۇزىلىسسىز التىن سالعان 69 كەلىدە سىنعا تۇسەدى.
«دانيار ەلەۋسىنوۆ، بىرىنشىدەن، الەم چەمپيونى. بۇرىن وليمپياداعا قاتىسقان. ازيا ويىندارىنىڭ چەمپيونى. ولاي بولاتىن بولسا، بۇل ازاماتتان بۇكىل قازاقستان، قازاق حالقى جەڭىس كۇتىپ وتىر»، - دەيدى نەسىپ ءجۇنىسباي ۇلى.
وكىنىشكە قاراي، افينى، بەيجىڭ، لوندوندا وتكەن جازعى وليمپيادا ويىندارىندا تۋ كوتەرىپ شىققان سپورتشىلارىمىزدىڭ ەشقايسىسى جەڭىس تۇعىرىنان كورىنە الماعان. ەندى ريودا ەل بايراعىن ناقتى كىم ۇستايتىنى ازىرگە بەلگىسىز. ونى باسەكە باستالۋىنا ساناۋلى ساتتەر قالعاندا ۇلتتىق وليمپيادا كوميتەتى مەن مادەنيەت مينيسترلىگى انىقتايدى.
