ت. مۇسابايەۆ بايقوڭىرلىقتاردى عارىش كۇنىمەن قۇتتىقتادى
«بايقوڭىر» عارىش كەشەنى تۇرعىندارى مەن قىزمەتكەرلەرىن قازاقستاندىقتاردىڭ اتىنان ق ر پرەزيدەنتىنىڭ كەڭەسشىسى، ۇشقىش-عارىشكەر تالعات مۇسابايەۆ، قازعارىش ءتوراعاسىنىڭ مىندەتىن اتقارۋشى ەركىن شايماعامبەتوۆ جانە بايقوڭىر قالاسىنىڭ قۇرمەتتى ازاماتى، قازعارىش ءتوراعاسىنىڭ ورىنباسارى ەرعازى نۇرعاليەۆ قۇتتىقتادى.
ق ر پرەزيدەنتىنىڭ كەڭەسشىسى تالعات مۇسابايەۆ ءوز قۇتتىقتاۋىندا الەمدىك عارىشتىڭ بەسىگىنە اينالعان «بايقوڭىر» عارىش كەشەنىن بىرلەسىپ پايدالانۋ قازاقستان مەن رەسەي اراسىنداعى ىنتىماقتاستىقتىڭ ماڭىزدى باعىتتارىنىڭ ءبىرى بولىپ وتىرعاندىعىن اتاپ وتكەن.
«كەز كەلگەن عارىشقا ۇشۋدى جۇزەگە اسىرۋ جانە ونىڭ تابىستى ورىندالۋى جەردەگى دايىندىق جۇمىستارىنا، «بايقوڭىر» عارىش ايلاعىنىڭ جەرۇستى ينفراقۇرىلىمى ماماندارىنىڭ قاجىرلى ەڭبەگىنە، عارىش سالاسىنىڭ بارلىق قىزمەتكەرلەرىنە بايلانىستى ەكەندىگى ەشكىمگە دە قۇپيا ەمەس.
وسىناۋ مەرەكە كۇنىندە قىزمەتى عارىشتى يگەرۋمەن بايلانىستى بارلىق مامانداردى قۇتتىقتايمىن. سىزدەردىڭ جۇمىستارىڭىز - بۇل ءبىزدىڭ بولاشاق ۇرپاققا تابىستايتىن زاماناۋي عىلىم مەن يننوۆاتسياعا، الدىڭعى قاتارلى تەحنولوگيالاردى دامىتۋعا قوسقان ۇلەس»، - دەلىنگەن قۇتتىقتاۋدا.
«قازعارىش» باسپا ءسوز قىزمەتى اقپاراتىنا قاراعاندا، تالعات مۇسابايەۆ پەن ەركىن شايماعامبەتوۆ «رەسەي عارىش» مەملەكەتتىك كورپوراتسياسىنىڭ شاقىرۋىمەن ادامزات بالاسىنىڭ عارىشقا العاش ۇشۋىنىڭ 55 جىلدىعىنا ارنالعان كرەملدەگى سالتاناتتى جيىنعا قاتىسۋ ءۇشىن ماسكەۋدە ءجۇر.
