ق ر ۇكىمەتى وتىرىسىندا سۋ تاسقىنى جاعدايى ماسەلەلەرى قارالدى

استانا. قازاقپارات - بۇگىن ۇكىمەت ۇيىندە ق ر پرەمەر-ءمينيسترى كارىم ءماسىموۆتىڭ توراعالىعىمەن ق ر ۇكىمەتىنىڭ سەلەكتورلىق رەجىمدەگى وتىرىسى ءوتتى.

ونىڭ بارىسىندا سۋ تاسقىنى، سۋ باسۋدىڭ الدىن الۋ بويىنشا قولدانىلىپ جاتقان شارالار، سونداي-اق كوكتەمگى-ەگىس جۇمىستارىنا دايىندىق ماسەلەلەرى قارالدى، دەپ حابارلادى www.primeminister.kz.

ىشكى ىستەر ءمينيسترى قالمۇحانبەت قاسىموۆتىڭ مالىمەتىنشە، اعىمداعى سۋ تاسقىنى جاعدايى ەلدىڭ ءتورت وڭىرىندەگى 43 ەلدى مەكەننىڭ تىرشىلىك ارەكەتىن قيىنداتتى، 535 تۇرعىن ءۇيدى سۋ باسىپ، ۇزىندىعى 20 شاقىرىم بولاتىن اۆتوموبيل جولدارىنىڭ 190 ۋچاسكەسىن سۋ شايعان، 2 كوپىر قيراعان.

ءمينيستردىڭ مالىمەتىنشە، اپاتتى جويۋ ماقساتىندا اپاتتىق-قۇتقارۋ جۇمىستارىنا ءتورت مىڭنان استام ادام، 1140 تەحنيكا بىرلىگى، 259 سۋ سورعىش قۇرىلعى جۇمىلدىرىلىپ، 36 شاقىرىم ۋاقىتشا بوگەت سالىندى. قولدانىلعان شارالاردىڭ ارقاسىندا 471 ءۇي قۇرعاتىلىپ، 500 دەن استام ادام تۇرعىلىقتى ورىندارىنا ورالدى.

قازىرگى ساتتە ۆەدومستۆونىڭ الدىندا اپات سالدارىن جويۋ، سۋ باسقان ايماقتاردا قۇتقارۋ جۇمىستارىن جۇرگىزۋ، وزەندەردىڭ دەڭگەيىن ۇزدىكسىز قاداعالاۋدى ۇيىمداستىرۋ، قاجەتتى تەحنيكانى دايىنداۋ جانە گيدروتەحنيكالىق قۇرىلىمداردىڭ جاعدايىن تۇراقتى باقىلاۋ بويىنشا مىندەتتەر تۇر.

كوكتەمگى-ەگىس جۇمىستارىنا دايىندىق بارىسى تۋرالى اۋىل شارۋاشىلىعى ۆيتسە-ءمينيسترى ەرلان نىسانبايەۆ مالىمدەدى. الدىن الا مالىمەتتەر بويىنشا، 2016-جىلى اۋىل شارۋاشىلىعى داقىلدارىن ەگۋگە ارنالعان القاپتى 21,6 ميلليون گەكتارعا دەيىن ارتتىرۋ جوسپارلانعان، بۇل 2015-جىلمەن سالىستىرعاندا 400 مىڭ گەكتارعا ارتىق. استىق داقىلدارىن 15,2 ميلليون گەكتارعا ەگۋ كوزدەلگەن.

ەنەرگەتيكا ءمينيسترى قانات بوزىمبايەۆ اۋىل شارۋاشىلىعى ونىمدەرىن وندىرۋشىلەرگە ارنالعان مۇناي ونىمدەرىنىڭ كولەمى جايلى مالىمەتتى تانىستىردى. ونىڭ ايتۋىنشا، ديزەل وتىنىنىڭ قورى اۋىل شارۋاشىلىعى تاۋارلارىن وندىرۋشىلەردىڭ قاجەتتىلىگىن تولىق قامتيدى، ونىڭ كولەمى 366,8 مىڭ توننانى قۇرادى.

وتىرىس قورىتىندىسى بويىنشا ك. ءماسىموۆ ۇكىمەت مۇشەلەرىنە سۋ تاسقىنى جاعدايىن تۇراقتى باقىلاپ، سونداي-اق ەگىس جۇمىستارىن ۇزدىكسىز جۇرگىزۋدى قامتاماسىز ەتۋدى تاپسىردى.