شەتەلدىك فۋتبولشىلار قازاقستانعا تەك بايۋ ءۇشىن كەلەدى

استانا. قازاقپارات - قازاقستان فۋتبول فەدەراتسياسىنىڭ پرەزيدەنتى ەرلان قوجاعاپانوۆ ەلىمىزدەگى فۋتبول سالاسىنىڭ جەمقورلىققا ابدەن باتىپ قالعاندىعىن ايتتى.

 ول قوستانايداعى كەي فۋتبولشىلاردىڭ جالاقىسىن ەستىگەندە تاڭ قالعانىن دا جاسىرعان جوق دەپ جازادى ناشا گازەتا باسىلىمىنا سىلتەمە جاساعان sn.kz.

فەدەراتسيا پرەزيدەنتى سالادا ورىن الىپ جاتقان بىلىقپەن ەندى قۇقىق قورعاۋ ورگاندارىنىڭ اينالىساتىنىن ەسكەرتتى.

"ماعان شەتەلدىك فۋتبولشىلار، اتاپ ايتار بولسام بالقاننان نەمەسە افريكادان كەلگەن لەگيونەرلەردىڭ كەيىنىرەك قازاقستانداعى كۇندەرىن اڭساپ سۇحبات بەرەتىنى ۇنامايدى. تىلشىلەر نەلىكتەن مۇنداي تاقىرىپتا سۇحباتتاسادى؟ ويتكەنى، قازاقستاندا لەگيونەرلەرگە كوپ جالاقى بەرىلەتىنىن ءبارى بىلەدى. بىزدە كوپ تولەيدى، ءبىراق، ويناماۋعا بولادى دەگەن ۇستانىم قالىپتاسىپ قالعان. قازاقستان چەمپيوناتىنا بايۋ ءۇشىن كەلەدى، مۇنداي كوزقاراستى وزگەرتۋ كەرەك. جاقسى ويىنشىلاردى اگەنتتەردىڭ كومەگىنسىز تاپقان ءجون، تىكەلەي شىعۋ كەرەك. مەن بۇل جايىندا "اقتوبە" باسشىلارىنا دا، وزگە كلۋبتارعا دا ەسكەرتكەنمىن"، - دەيدى قوجاعاپانوۆ.

ونىڭ ايتۋىنشا، قازاقستاندا 70 مىڭ ەۋرو جالاقى الىپ ويناعان لەگيونەرلەر بۇگىندە وزگە كلۋبتاردا 9 مىڭ ەۋروعا دوپ تەۋىپ ءجۇر.

«قازاقستان چەمپيوناتىندا  70000 ەۋرو جالاقى العان ويىنشىلار بۇگىندە وزگە چەمپيوناتتاردىڭ ەكىنشى ليگاسىندا  9000 ەۋرو ءۇشىن ويناپ ءجۇر. دەمەك، ولاردىڭ لايىقتى قۇنى سول 9 مىڭ ەۋرو دەگەن ءسوز. نەلىكتەن ول ءبىزدىڭ چەمپيوناتتا 70 مىڭ ەۋرو الادى؟ مۇنىڭ ءبىر عانا جاۋابى بار، ول - جەمقورلىق. دەگەنمەن، بۇل بىلىققا ەندى قۇقىق قورعاۋ ورگاندارىنىڭ ماماندارى نۇكتە قويادى"، - دەپ اتاپ ءوتتى ق ف ف پرەزيدەنتى.

ايتا كەتەيىك، وتكەن جىلى اقتوبە وبلىسىنىڭ اكىمى "اقتوبە" كلۋبىنىڭ ساپىنداعى ويىنشىلاردىڭ جالاقىسىن ايتىپ، جۇرتتىڭ جاعاسىن ۇستاتقان بولاتىن. ماسەلەن، دانيلو سيرينو -  57000 ەۋرو، اندەرسون سانتانا -  61000 دوللار، دانيلو نەكو -  000 67 ەۋرو، ماركوس پيزەللي 75 مىڭ دوللار جالاقى الىپ وتىرعان.

Nur.kz