استانا ماڭىنداعى اسكەري بولىمدە لاڭكەستىككە قارسى وپەراتسيا وتكىزىلۋدە - فوتو
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتى حابارلادى.
68665 اسكەري بولىمىندە 2016-جىلعا ارنالعان ق ر ق ك قۇرلىق اسكەرلەرىنىڭ باسقارۋ ورگاندارى، قۇرامالارى مەن بولىمدەرىنىڭ دايىندىق جوسپارىنا سايكەس الەۋەتتى مينيسترلىكتەر مەن ۆەدومستۆولاردىڭ كۇشتەرى مەن قۇرالدارىن تارتا وتىرىپ، جەرگىلىكتى جەردەگى ەكى دارەجەلى كوماندالىق-شتابتىق وقۋ-جاتتىعۋى باستالدى.
بۇل وقۋ-جاتتىعۋدىڭ ەرەكشەلىگى - بريگادا بولىمشەلەرىنىڭ لاڭكەستىككە قارسى وپەراتسيالار تاپسىرمالارىن ورىنداۋ، ارنايى اسكەري ءىس-قيمىلداردى ۇيىمداستىرۋى بولماق. اسكەريلەر ءىس جۇزىندە اسكەري قۇرالىمداردىڭ باسقارۋ ورگاندارىمەن، اۋماقتىق اسكەرلەرمەن جەدەل جانە تاكتيكالىق دەڭگەيدە ءوزارا ءىس-قيمىلدى پىسىقتايدى.
قاۋىپتىلىگى تومەن قارۋلى جانجالداردا قارۋلى كۇشتەردى قولدانۋدىڭ حالىقارالىق تاجىريبەسى ەسكەرىلە وتىرىپ، ارنايى ماقساتتاعى بولىمشەلەردى دايارلاۋ مەن جەتىلدىرۋگە ەرەكشە كوڭىل اۋدارىلدى.
وقۋ-جاتتىعۋدا الەۋمەتتىك-ساياسي جاعداي شيەلەنىسكەن تۇس نەگىزگە الىنعان. دۇكەندەردىڭ جاپپاي ويراندالۋى مەن اكىمشىلىك عيماراتتار مەن كولىكتىڭ ورتەنۋىنە ۇلاسۋدا. بۇنىڭ ءبارى لاڭكەستىككە قارسى وپەراتسيانىڭ جۇرگىزىلۋى مەن ارنايى اسكەري ءىس-قيمىلداردىڭ ۇيىمداستىرىلۋىنا سەبەپكەر بولۋدا.
اڭىز بويىنشا ەلدىڭ جولى قيىن اۋداندارىندا اتىس قارۋىمەن، قول گراناتا اتقىشتارى، تاسىمالداناتىن مينا اتقىشتارمەن قارۋلانعان 100-150 ادامنان قۇرالعان جاۋىنگەرلىك جاساقتار پايدا بولعان. توپتتىڭ ءبىرى ءىرى ەلدى مەكەننىڭ جەكە عيماراتىندا ورنالاسقان. وقۋ-جاتتىعۋعا قاتىسۋشىلاردىڭ مىندەتى - اۋداندى قورشاۋعا الۋ، زاڭسىز قارۋلانعان قۇرالىمدى جويۋ.
وقۋ-جاتتىعۋدى وتكىزۋ كەزىندە لاڭكەستىككە قارسى وپەراتسيانى جۇرگىزۋ ۇلگىلەرى مەن تاسىلدەرىن دامىتۋدىڭ نەگىزگى ءۇردىسى ەسكەرىلەتىن بولادى. ول بلوك-بەكەتتەردەگى بولىمشەلەردىڭ وقشاۋلاۋ-بۇعاتتاۋ ءىس-قيمىلدارى، ماڭىزدى مەملەكەتتىك نىسانداردى كۇزەتۋ مەن قورعاۋ جانە سودىرلاردى جويۋ.
وقۋ-جاتتىعۋعا قۇرلىق اسكەرلەرى باس قولباسشىسى باسقارماسىنىڭ، 68665 اسكەري ءبولىمىنىڭ، ق ر مەملەكەتتىك كۇزەت قىزمەتىنىڭ اسكەري قىزمەتشىلەرى، استانا قالاسىنىڭ توتەنشە جاعدايلار كوميتەتى، ق ر ۇلتتىق ۇلانى تارتىلادى. وقۋ-جاتتىعۋعا بارلىعى 1000 نان اسا جەكە قۇرام جانە 200 دەن استام بىرلىك اسكەري تەحنيكا قاتىسادى.
