عارىش سالاسىنا قۇيىلعان قاراجات وتاندىق جەرسەرىكتەردىڭ قىزمەتىمەن وتەلەدى
دەگەنمەن عارىش سالاسىندا ءالى اتقارىلۋى ءتيىس ماڭىزدى مىندەتتەر بار. سوندىقتان سەنات دەپۋتاتتارى اقكول قالاسىنداعى جەر ءۇستى باسقارۋ كەشەنىمەن ارنايى تانىستى.
2011 جانە 2014 - جىلدارى ىسكە قوسىلعان قازاقستاندىق ەكى تەلەكوممۋنيكاتسيالىق سپۋتنيك مۇلتىكسىز قىزمەت كورسەتىپ تۇر. بۇل عارىشتىق قوندىرعىلارعا ەل نارىعىندا سۇرانىس جوعارى. كوكتەگى قوس بىردەي «قازسات-2» جانە «قازسات-3» عارىش اپپاراتتارى جەردەگى وسى ورتالىقتا باسقارىلادى. اقمولا وبلىسىنىڭ اقكول ەلدى مەكەنىندە ورنالاسقان بۇل جەر ءۇستى باسقارۋ كەشەنىنسىز ەلىمىزدىڭ بايلانىس سالاسىن ەلەستەتۋ مۇمكىن ەمەس. سەبەبى مىناداي الىپ انتەننالار جانە عارىشتاعى قازاقستاندىق سپۋتنيكتەر ارقىلى وتاندىق ارزان ءارى ساپالى بايلانىس قىزمەتتەرىنە قول جەتتى.
سەنات دەپۋتاتتارىنىڭ جەر ءۇستى باسقارۋ كەشەنىنە ارنايى بارۋىندا ءمان بار. سەبەبى ۇلتتىق قاۋىپسىزدىك نىسانى سانالاتىن بۇل عيماراتتىڭ مۇلتىكسىز قىزمەت كورسەتۋى ماڭىزدى. سوندىقتان مۇنداعى ماماندار باسقارۋ قوندىرعىلارىمەن ۇزدىكسىز جۇمىس ىستەپ كەلەدى. سولاردىڭ قاتارىندا ەلىمىزدىڭ قورعانىس سالاسىنا قاجەتتى عارىش اپپاراتتارىن مەڭگەرگەن اسكەريلەر دە بار.
باۋىرجان قۇدابايەۆ، «رەسپۋبليكالىق عارىشتىق بايلانىس ورتالىعى» پرەزيدەنتىنىڭ ورىنباسارى:
- سانكت- پەتەربۋرگتە وقىعان بالالار ورالىپ جاتىر. داينىدىقتارى وتە جوعارى. سوندىقتان ءوزىمىزدىڭ عارىش اگەنتتىگى ارقىلى قورعانىس مينيسترلىگىنە حات جازدىق. بولاشاقتا قورعانىس مينيسترلىگىندە سپۋتينيكتەر بولسا، سولاردى دايىن ازاماتتار قولدانادى عوي.
سەناتورلار تاياۋدا زاڭنامالىق اكتىلەرگە عارىش ماسەلەلەرىنە قاتىستى وزگەرتۋلەر ەنگىزدى. مۇنداعى ماقسات - سالادا قالىپتاسقان ينفراقۇرىلىمدىق جۇيەلەردى ءتيىمدى پايدالانۋ. وسى ورايدا دەپۋتاتتار ءبىرقاتار ماڭىزدى ماسەلەنى ورتاعا سالدى. ماسەلەن، بايقوڭىر كەشەنىن يگەرىپ، قازىناعا قوماقتى قارجى ءتۇسىرۋ ءۇشىن عارىش سالاسىنا جاڭا سەرىكتەستەر كەرەك. سوندىقتان رەسەي، جاپونيا، فرانسيا، ۋكراينا سىندى ەلدەرمەن ءتيىمدى ارىپتەستىك ورناتىلىپ جاتىر دەيدى ماماندار.
مەيىربەك مولدابەكوۆ، ق ر ي د م ايروعارىش كوميتەتى ءتوراعاسىنىڭ ورىنباسارى:
- پەتروپاۆلدا ماشينا جاساۋ زاۋىتى بار. سوندا اسكەري زىمىراندار شىعاراتىن تەحنولوگيا بار. ءبىراق ول بايقوڭىردان زىمىراندار ۇشىرۋ ءۇشىن بىزگە جەتكىلىكسىز. بىزگە ستراتەگيالىق ارىپتەس كەرەك. ولاردىڭ زىمىراندار شىعارۋعا مۇمكىنشىلىگى بولۋ كەرەك. قازىر رەسەيمەن كەلىسىپ جاتىرمىز. انگارا زىمىرانى بىزگە ءتيىمسىز بولعاندىقتان، باسقا زىمىراندى پايدالانۋ جونىندە كەلىسىپ جاتىرمىز. سول جۇمىستار 2021 -جىلدان باستالايىن دەپ جاتىر.
قازاقستاندىق عارىش اپپاراتتارىنىڭ نۇكتەسىن كەڭەيتۋ دە وزەكتى ماسەلە. قازىر ەنشىمىزدە ءبىر عانا وربيتالىق نۇكتە بار. قازعارىش ماماندارى وسى جاعدايعا الاڭداۋلى. سەبەبى جاقىن بولاشاقتا ەلىمىزدىڭ تاعى ءبىر عارىش اپپاراتىن ۇشىرۋ ءۇشىن وعان كەڭىستىكتەن ءتيىستى ورىن بەلگىلەۋ قاجەت. ساپار بارىسىندا كوتەرىلگەن وسىنداي ماسەلەلەردى سەناتورلار ەندى زاڭ شىعارۋ دەڭگەيىندە جان- جاقتى سارالاپ، ءتيىستى شەشىم قابىلداماق.
www.24.kz
