بوكەي وردالىقتار كۇللى الەمنىڭ يادرولىق قارۋدان ادا بولۋىن قولدايدى - ت. ارىستانبەكوۆ

ورال. قازاقپارات - بوكەي ورداسى اۋدانىنىڭ تۇرعىندارى ەلباسى نۇرسۇلتان نازاربايەۆتىڭ ۆاشينگتون سامميتىندەگى باستاماسىن، ياعني كۇللى الەمنىڭ يادرولىق قارۋدان ادا بولۋىن قولدايدى.

بۇل تۋرالى «نۇر وتان» پارتياسى بوكەي ورداسى اۋداندىق فيليالى ءتوراعاسىنىڭ ءبىرىنشى ورىنباسارى، اۋداندىق ءماسليحات دەپۋتاتى تىلەگەن ارىستانبەكوۆ ءمالىم ەتتى.

ونىڭ ايتۋىنشا، قازاقستان پرەزيدەنتىنىڭ «الەم. ХХІ عاسىر» مانيفەسىندە ايتىلعان ورەلى ويلار بوكەي وردالىقتارعا ەرەكشە جاقىن. ويتكەنى ۇلى وتان سوعىسى كەزىندە وسى وڭىردەن تالاي بوزداق مايدانعا اتتانىپ، قازا تاپسا، ونىڭ ۇستىنە ستالينگراد مايدانى وردا (قازىرگى بوكەي ورداسى) اۋدانىنا ءتيىپ تۇرعاندىقتان، ول سوعىس جاعدايىندا دەپ جاريالاندى. سوندىقتان اۋدان جەرىنە تالاي بومبا ءتۇسىپ، كوپتەگەن عيماراتتار قيراپ، ادامدار قازا تاپتى. سول كەزدەگى اۋدان تۇرعىندارى وسىنىڭ ءبارىن كوزبەن كورىپ، سوعىس زۇلماتىن جۇرەگىمەن سەزىندى. ۇلى وتان سوعىسىنان كەيىن ەل ەڭسەسىن ەندى تىكتەي باستاعان كەزدە، 1952 -جىلى وردا اۋدانى تاراتىلىپ، حالقى بوسىپ كەتتى.

«سول 1952 -جىلى اۋداندا 61 مىڭ حالىق بولعان ەكەن، ولاردىڭ دەنى باتىس قازاقستاننىڭ فۋرمانوۆ، تايپاق، چاپايەۆ اۋداندارىنا جانە وڭتۇستىك قازاقستانعا كۇشپەن كوشىرىلدى. ءارى اۋدانىمىزدىڭ 945 مىڭ گەكتار جەرى اسكەري سىناق پوليگونىنا بەرىلگەن. باتىسىمىزدا «كاپۋستين يار»، وڭتۇستىگىمىزدە «ازعىر» پوليگوندارى ورنالاسقان. پوليگونداردا زاردابى وراسان زور ءتۇرلى اسكەري قارۋلار سىنالدى. ەلىمىز بويىنشا پوليگوننان ەڭ كوپ زارداپ شەككەن ءوڭىردىڭ ءبىرى ءبىزدىڭ اۋدانىمىز ەكەنى كوپكە ءمالىم. قازىر اۋداندا 16 جاسقا دەيىنگى 67 تۋا بىتكەن مۇگەدەك بالا بار. بۇل از قاسىرەت ەمەس. سوندىقتان ءبىز ەلباسىمىزدىڭ دۇنيە ءجۇزى حالىقتارىن سوعىسسىز ءومىر سۇرۋگە شاقىرۋىن جان-جۇرەگىمىزبەن قولداپ، قۋاتتايمىز»، دەدى ت. ارىستانبەكوۆ.

اۆتور: ەلجان ەرالى