قازاقستان قىتايمەن سوت ورگاندارىنىڭ ءبىلىم ورتالىقتارى اراسىنداعى بايلانىستى ورناتۋعا مۇددەلى - ق. ءمامي
دەلەگاتسيا قۇرامىندا جوعارعى سوتتىڭ مامانداندىرىلعان القاسىنىڭ سۋدياسى م. بالكەن، اقمولا جانە باتىس قازاقستان وبلىستىق سوتتارىنىڭ ءتوراعالارى ن. ءابدىقانوۆ پەن ب. امەتوۆ، قازاقستان رەسپۋبليكاسى جوعارعى سوتىنىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتى باسشىسىنىڭ ورىنباسارى ءا. قاسەنوۆا بار.
دەلەگاتسيا ق ح ر جوعارعى حالىقتىق سوتىنىڭ ءتوراعاسى چجوۋ تسيانمەن كەزدەستى.
كەزدەسۋ بارىسىندا ق. ءمامي: «بيىلعى قاڭتاردا ءبىزدىڭ ەلدەرىمىز اراسىنداعى ديپلوماتيالىق قارىم- قاتىناستىڭ ورناعانىنا 24 جىل تولدى. وسى ۋاقىت ارالىعىندا ءوزارا ءىس- قيمىلدىڭ كەڭ اۋقىمدى سالالارى بويىنشا ەكىجاقتى بايلانىستاردى سەرپىندى نىعايتۋعا باعىتتالعان ورنىقتى ساياسي ءباتۋالاستىققا قول جەتكىزىلدى» ، - دەپ اتاپ ءوتتى.
قازاقستاندىق سوت جۇيەسىنىڭ دامۋى جونىندە ايتا كەلە، قايرات ءمامي مەملەكەت باسشىسى جاريالاعان «100 ناقتى قادام» ۇلت جوسپارىن ىسكە اسىرۋ شەڭبەرىندە ەلىمىزدىڭ سوت- قۇقىقتىق سالاسىنداعى وڭ وزگەرىستەر تۋرالى حاباردار ەتتى. اتاپ ايتقاندا، ءۇش ساتىلى سوت جۇيەسىنە كوشۋ، پروتسەستىك زاڭنامانىڭ جاڭارۋى، سۋديالاردى ىرىكتەۋ جانە كاسىبي دايارلاۋ جۇيەسى، ينۆەستورلارعا ارنالعان مامانداندىرىلعان سوت پەن حالىقارالىق كونسۋلتاتيۆتىك كەڭەس قۇرۋ تۋرالى توقتالدى. داۋلاردى شەشۋدىڭ بالامالى ءتاسىلىن ەنگىزۋ جانە سوت ءىسىن جۇرگىزۋدە ەلەكتروندىق تەحنولوگيالاردى قولدانۋ سالاسىندا ءوزارا تاجىريبەنى، اقپاراتتى جانە ەڭ ۇزدىك جەتىستىكتەردى الماسۋعا ەرەكشە نازار اۋدارىلدى.
قازاقستاندىق دەلەگاتسيا سونداي- اق قىتايداعى سۋديالاردىڭ مەملەكەتتىك اكادەمياسىندا بولىپ، وندا جوعارعى سوت ءتوراعاسى ەكى ەلدىڭ سوت ورگاندارىنىڭ ءبىلىم ورتالىقتارى اراسىنداعى بايلانىستى ورناتۋعا مۇددەلىلىك تانىتتى. مۇنداي ىنتىماقتاستىق كاسىبي بىلىكتىلىگىن ارتتىرۋ سالاسىندا ءبىلىم الۋشىلارمەن پروفەسسور- وقىتۋشىلار قۇرامى ءۇشىن ءوزارا تاجىريبە جانە ءبىلىم الماسۋعا سەپتىگىن تيگىزەتىندىگى اتاپ ءوتىلدى.
ساپار شەڭبەرىندە 12 - ساۋىردە قازاقستاندىق دەلەگاتسيانىڭ قىتاي كوممۋنيستىك پارتياسى ورتالىق كوميتەتى ساياسي- زاڭدىق كوميسسياسىنىڭ حاتشىسى، قىتاي كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى مەن تسزيانچجۋمەن كەزدەسۋى جوسپارلانعان.
اۆتور: ن. نۋراحمەت
