قىتايدا ءىستى بولعان اقجارقىن تۇرلىبايدىڭ اپەللياتسيالىق سوتى ونىڭ پايداسىنا شەشىلۋى مۇمكىن

استانا. قازاقپارات - قىتايدا ءىستى بولعان وتانداسىمىزدىڭ اپەللياتسيالىق سوتى ونىڭ پايداسىنا شەشىلۋى مۇمكىن. سەبەبى بۇل ىسكە بايلانىستى جاڭا دەرەكتەر انىقتالىپتى دەپ حابارلايدى «ك ت ك» ارناسى.

ەسىرتكى كونترابانداسى بويىنشا ۇستالىپ، ءومىر بويى باس بوستاندىعىنان ايىرىلعان اقجارقىن تۇرلىبايدىڭ اپەللياتسيالىق شاعىمى 5 ساعات بويى قارالىپ، شەشىم شىعارۋ كەيىنگە قالعان بولاتىن.

ادۆوكاتتاردىڭ ايتۋىنشا، بۇل ءبىرقاتار جاڭا دەرەكتەردىڭ اشىلۋى بايلانىستى بولىپ وتىر. ال ەكى جىل بويى قىتاي تۇرمەسىندە جاتقان اقجارقىننىڭ قال-جاعدايى جاقسى، وعان ءتىپتى 15 مينۋتقا اناسىمەن كەزدەسۋگە مۇمكىندىك بەرىلدى.

ايتا كەتەرلىگى سوت بۇنداي كەزدەسۋگە تەك ناقتى ۇكىم شىققان سوڭ عانا رۇقسات ەتەتىن. 20 جاستاعى قازاقستاندىق ستۋدەنت اقجارقىن تۇرلىباي گۋاڭجوۋ اۋەجايىندا 2014-جىلدىڭ ناۋرىزىندا ۇستالعان. وعان ەسىرتكى تاسىدى دەگەن ايىپ تاعىلعان بولاتىن. ءبىراق بويجەتكەننىڭ ايتۋىنشا، وعان تانىستارىنىڭ ءبىرى ءساندى كيىمدى قازاقستاننان قىتاي ارقىلى مالايزياعا جەتكىزۋ جايلى ۇسىنىس جاساپتى. ال سومكەنىڭ ىشىندە ەسىرتكىنىڭ بارىن بىلمەدىم دەيدى اقجارقىن.

«قىتاي اۋماعىندا قازاقستان ازاماتتارىنىڭ قۇقىعىن قورعاۋ ءبىزدىڭ باستى ماقساتىمىز. اقجارقىنمەن بىرنەشە رەت كەزدەسىپ، ونىڭ قال-جاعدايىن ءبىلىپ، ايتقاندارىن تىڭدادىق. گۋانجوۋ پوليتسەيلەرىمەن دە كەلىسسوز جۇرگىزىلدى»، - دەيدى قازاقستاننىڭ قىتايداعى ەلشىلىگى كونسۋلدىق ءبولىمىنىڭ باسشىسى بولات سىرلىباي.