وقۋشىلار جاۋىنگەرلىك تاپسىرمالاردى ورىندايتىن روبوتتار قۇراستىردى - فوتو
جوبالار جارىلعىش قۇرىلعىلاردى زالالسىزداندىرۋدان باستاپ راديوبەلسەندى قالدىقتاردى تاسىمالداۋعا دەيىنگى جاۋىنگەرلىك تاپسىرمالاردى ورىنداۋ ماقساتىندا قۇراستىرىلعان.
وقۋشى ينجەنەرلەر بولاشاقتا اسكەريلەردىڭ قاۋىپسىزدىگىن قامتاماسىز ەتەتىن تەحنيكانى جاساۋمەن اينالىسقىسى كەلەتىندەرىن ءمالىم ەتتى.
روبوتتار كورمەسى ІІ وڭتۇستىك قازاقستان «ايبىن» اسكەري-پاتريوتتىق جاستار جيىنى شەڭبەرىندە وتكىزىلدى. وندا وبلىستاعى بارلىق اۋداندارىنان 18 كوماندا باق سىناستى. سايىستىڭ اشىلعانى تۋرالى ق ر قورعانىس ءمينيسترىنىڭ ورىنباسارى گەنەرال-مايور تالعات مۇحتاروۆ حابارلادى.
35748 اسكەري ءبولىمى وركەسترىنىڭ سۇيەمەلدەۋىمەن كوماندالار ستاديوندا مارشپەن ءجۇرىپ ءوتىپ، اسكەري دودا باستالدى. قاجىمۇقان مۇڭايتپاسوۆ اتىنداعى ورتالىق ستاديوندا ءوڭىردىڭ وقۋشىلارى سپورتتىڭ 11 اسكەري-قولدانبالى ءتۇرى بويىنشا وزدەرىنىڭ جەتىستىكتەرىن كورسەتتى. ولاردىڭ اراسىندا كالاشنيكوۆ اۆتوماتىن بولشەكتەپ، قۇراستىرۋ، بەلتەمىرگە تارتىلۋ، ورنىندا تۇرىپ ۇزىندىققا سەكىرۋ، سەرىپپەدەگى كۇشتىك جاتتىعۋلار، بۇلشىق ەتتى قاتايتۋ، جالپى اسكەري قورعانىس كوستيۋمىن جەدەل كيۋ، باستاپقى مەديتسينالىق كومەك كورسەتۋ جانە قىز بالالارعا ارنالعان كۇشتىك جاتتىعۋلار كەشەنى بولدى.
ارالارىندا قىزدار دا بار مەكتەپتەردىڭ 216 وقۋشىسى ناعىز سايىستا كۇش سىناستى. وڭتۇستىك قازاقستان وبلىسىنىڭ قورعانىس ىستەرى جونىندەگى دەپارتامەنتىنىڭ حابارلاۋىنشا، قاتىسۋشىلار ناعىز اسكەري قىزمەتشىلەرگە ءتان ناتيجەلەر كورسەتتى. قورىتىندىدا سپورتتىڭ 6 اسكەري-قولدانبالى تۇرىندە ءبىرىنشى ورىندى يەلەنگەن ارىس قالاسىنىڭ كومانداسى جەڭىمپاز اتاندى. ەكىنشى ورىندى كەنتاۋ قالاسىنىڭ وقۋشىلارى ەنشىلەدى. 1 ۇپاي ايىرماشىلىقپەن تۇركىستان قالاسىنىڭ وقۋشىلارى ءۇشىنشى ورىنعا تۇراقتادى. ءار اتالىمدا جەڭىمپازدارعا كۋبوكتار، گراموتالار جانە باعالى سىيلىقتار تابىس ەتىلدى.
