سانگە قايتادان ورالعان بۇيىمدار - فوتو

استانا. قازاقپارات - جىلدار وتكەن سايىن ءسان كەزەكتى اينالىمىن جاسايدى. بارلىعى ۇمىتقان كيىمدەر، الدىمەن پوديۋمداردى جاۋلاپ، سودان سوڭ ءسانقوي قىزداردىڭ دا كيىم ىلگىشىنەن ورىن الادى.

بۇگىنگى ماتەريالدا ءساندى ترەندكە كەنەتتەن ورالعان 10 بۇيىمدى ۇسىنامىز.

بارقىت رەزەڭكە

مۇنداي رەزەڭكەلەر 90-جىلدارى كەڭىنەن تانىلدى. ءسانقوي قىزدار ونىڭ كومەگىمەن «پالما» شاش ۇلگىسىن جاساپ، كەيدە بىردەن بىرنەشە رەزەڭكەنى دە تاعاتىن. قازىر بىرنەشەۋىن قولدانباي-اق، بىرەۋىن قولدانعاننىڭ ءوزى جەتكىلىكتى. بارقىت رەزەڭكەنىڭ ولشەمى ۇلكەن ءارى بەزەندىرىلگەن ءتۇرىن تاڭداۋدىڭ قاجەتى جوق. ەشقانداي جىلتىرسىز قاراپايىم بارقىت رەزەڭكە بولعانى جاقسى.

چوكەر

90-جىلدارى بارقىت رەزەڭكەدەن باسقا، ءتۇرلى چوكەرلەر دە ساندە بولدى. قاراپايىم بارقىت لەنتالاردان باستاپ كۇردەلى بەزەندىرىلگەن تۇرلەرى قولدانىلاتىن. بۇگىن دە چوكەرلەر ءسان الەمىن جاۋلاپ الدى. ەگەر ساۋدا ورتالىقتارىنان ويىڭىزدان شىعاتىن چوكەر تابا الماساڭىز، تىگىن بۇيىمدارىن ساتاتىن دۇكەنگە بارىڭىز. ءتۇرلى ۇلگى جاساۋ ءۇشىن كەز كەلگەن لەنتا مەن باۋ (بارقىت، اتلاس، بىلعارى) ساتىپ الىپ، قالاعان چوكەرىڭىزدى جاساپ الىڭىز.

قىستىرعىشتار

2000-جىلدارى شاشقا ارنالعان ءتۇرلى ءتۇستى قىستىرعىشتار ءسانقوي قىزداردىڭ اراسىندا تانىمال بولدى. الايدا ولار بىردەن جوعالىپ كەتتى. بيىل قىستىرعىشتار الەمدىك ءسان كورسەتىلىمىندە ورىن الدى.

كەڭ بالاقتى قىسقا جينسي شالبار

ماۋسىمنىڭ must have كىلتى - توبىقتى اشىپ تۇراتىن قىسقارتىلعان كەڭ بالاقتى جينسي شالبارلار. ارينە، بۇل شالبار ۇلگىسىن دە كەشە ويلاپ تاپقان جوق. مۇنداي شالبارلار جيىرما جىل بۇرىن ساندە بولعان. بۇگىن دە بۇل شالباردى كەز كەلگەن دۇكەندەردەن تابا الاسىزدار.

جاپسىرمالار

بۇرىن جوعارعى سىنىپتاعى مەكتەپ وقۋشىلارى كۇرتەلەرىن، ريۋكزاكتارىن جانە جينسي شالبارلارىن ءتۇرلى-ءتۇرلى جاپسىرمالارمەن قاپتاپ قوياتىن بولعان. ەندى وسى جاپسىرمالار قايتادان سانگە ورالدى. ءبىراق جاپسىرمالار مەكتەپ وقۋشىلارى اراسىندا ەمەس، ەرەسەكتەرگە ارناپ شىعارىلدى. ەسكى ءسان جينسي شالبارلارعا، جينسي كۇرتەلەرگە جانە بىلعارى كۇرتەلەرگە ورالدى.

بەرەت

بەرەت - وڭاي ۇيلەستىرىپ كيىلەتىن باس كيىم ەمەس. دۇرىس ۇيلەستىرمەگەن جاعدايدا، ول ءسىزدى جاسىڭىزدان ۇلكەن كورسەتۋى مۇمكىن. قازىرگى اۋا-رايىندا بەرەتتى جەڭىل نازىك كويلەكتەردىڭ سىرتىنان بىلعارى كۇرتە كيىپ، سايكەستەندىرۋگە بولادى.

«تيتانيك» بەينەلەنگەن كيىمدەر

بالالىق كەزىن 90-جىلداردا وتكىزگەن كەز كەلگەن ۇلدار مەن قىزداردىڭ ارمانى «تيتانيك» بەينەلەنگەن فۋتبولكالار مەن جەيدەلەر الۋ بولعان. فيلمنىڭ شىققانىنا 20 جىلداي ۋاقىت وتسە دە، بۇل ترەند قايتادان سانگە ورالدى. بۇل ترەندتىڭ قايتا ورالۋىنا «كىنالى» - Vetements پاريجدىك برەندىن باسقاراتىن ديزاينەر دەمنا گۆاساليا.

ميۋلي اياق كيىمى

ميۋلي اياق كيىمى سانگە بىلتىرعى جىلى قايتىپ كەلگەن بولاتىن. الايدا، ءسان الەمىندە ءوز ورنىن نىق ساقتاپ تۇر. 2000-جىلدارى مۇنداي اياق كيىمدى بارلىعى دەرلىك كيەتىن بولعان.

جينسي كۇرتەسى

90-جىلدارداعى جاسوسپىرىمدەردىڭ تاعى ءبىر كەڭىنەن تاراعان كيىمدەردىڭ ءبىرى -جينسي كۇرتەسى. ءبىراق ول كەزدە ءتۇرلى كولەمدى جىلتىرلارى بار جينسي كۇرتەسىن تەمىرلەرى بار باس كيىمدەرمەن (كەپكا) ۇيلەستىرىپ كيەتىن بولعان. قازىر ساندە قاراپايىم جانە كەڭ تۇراتىن جينسي كۇرتەلەرى.

باسى ۇشكىر اياق كيىمدەر

باسى ۇشكىر اياق كيىمدەر دە سانگە قايتىپ ورالدى. ءبىراق اياق كيىمدەردىڭ باسى 90-جىلدارداعىداي قاتتى ۇزىن ۇشكىر بولمايدى. باسى ۇشكىر اياق كيىمدەر اياقتى ۇزارتىپ كورسەتەتىنىن ۇمىتپاڭىزدار.

massaget.kz