ارتىق تۇكتەن ارىلۋدىڭ وڭاي جولى

استانا. قازاقپارات - كوپتىڭ ويىندا جۇرەتىن سۇراقتىڭ ءبىرى - دەنەدەگى تۇكتەن قالاي ارىلۋعا بولادى؟

مۇمكىن، ءسىز دە وسىعان جاۋاپ ىزدەگەن بولارسىز. ارتىق تۇكتەن ارىلۋ ءۇشىن ونى قىرىپ، جۇلىپ، ەپيلياتسيا دا جاساعان شىعارسىز. ال بۇل پروتسەدۋرالاردى بەلگىلى ءبىر مەرزىمدە ۇنەمى قايتالاپ تۇرۋ كەرەك جانە ولاردىڭ ءبارى دە ايتارلىقتاي وڭاي، ءارى «جاعىمدى» ءىس ەمەس. ەندەشە نە ىستەۋ كەرەك؟

الدىمەن دەنەدەگى ارتىق تۇكتىڭ نەدەن پايدا بولعانىنا كوز جەتكىزۋ كەرەك. ونىڭ سەبەپتەرى دە ءارقالاي:

گورموندىق وزگەرىستەر؛

اندروگەندەر (اتالىق جىنىس گورمونى) مولشەرىنىڭ ارتۋى؛

بۇيرەك ءۇستى بەزىندەگى ىسىك؛

كۋشينگ اۋرۋلارى؛

ينسۋلينگە قارسىلىق، ت. ب.

دەنەڭىزدى تۇك باسۋىنىڭ سەبەبى وسى اتالعانداردىڭ ءبىرى بولسا، وندا مىندەتتى تۇردە ارنايى ماماندارعا قارالىپ، كەڭەستەرىنە قۇلاق ءتۇرۋ كەرەك. ال ەگەر اسا قاۋىپتى ەشتەڭە بولماسا، دەنەدەگى ارتىق تۇكتەن ارىلۋدىڭ ءداستۇرلى ءادىس-تاسىلدەرى دە از ەمەس. ەشقانداي ەپيلياتسيا مەن قىرىنۋعا جولاماي-اق، سول تاسىلدەردىڭ ءبىرىن بايقاپ كورىڭىز.

جالبىز (مياتا)

بۇل وسىمدىك اتالىق جىنىس گورموندارىنىڭ مولشەرىن جاقسى قاداعالايدى. ازداعان كەپتىرىلگەن جالبىزدى ءبىر ستاكان سۋعا سالىپ قايناتىڭىز. قايناعاندا وتتان الىپ، 5 مينۋتتان كەيىن ءسۇزىپ، كۇندەلىكتى ءىشىپ (1 ستاقان) تۇرۋ كەرەك.

رايحان مەن پياز قوسپاسى

رايحاننىڭ 9-12 جاس جاپىراعى مەن 1 پيازدان 3-4 ساقينالاپ كەسىپ الىپ، ولاردى ابدەن ەزۋ كەرەك. دايىن قوسپانى تۇك مول شىعاتىن جەرىڭىزگە ماي سياقتى جاعىپ قويىڭىز. بۇل پروتسەدۋرانى ءبىر اي ۇزبەي جاساڭىز.

كۋركۋما

3 اس قاسىق تاتتىلىگى تومەن يوگۋرت، 2 اس قاسىق ۇن مەن 0,5 شاي قاسىق كۋركۋما ۇنتاعىن ارالاستىرۋ كەرەك. بۇل قوسپانى بىرنەشە اي بويى بەتكە جاعاتىن بولسا، بەت تەرىسى جۇمساق، ارتىق تۇكسىز تەپ-تەگىس بولادى.

بال مەن ليمون شىرىنى

2 اس قاسىق ارا بالى مەن 1 شاي قاسىق ليمون شىرىنىن ارالاستىرىڭىز. دەنەدەگى تۇك كوپ جەرگە جاعىپ، 15 مينۋتتان كەيىن جىلى سۋمەن جۋىپ تاستاۋ كەرەك. مۇنداي ماسكانى اپتاسىنا ەكى رەت قايتالاعان دۇرىس.

massaget.kz