اجال الدىنداعى ارمان

استانا. قازاقپارات - اعىلشىندىق «لەستەر» فۋتبول كلۋبىنىڭ اۋستراليالىق جانكۇيەرى توني سكەففينگتون سۇيىكتى كومانداسىنىڭ چەمپيون اتانعانىن كورىپ بارىپ، دۇنيەدەن وزعانىن تىلەپ ءجۇر.

بۇل تىلەگى - ونىڭ اجال الدىنداعى سوڭعى ارمانى ەكەن...

توني سكەففينگتون ءبىر جىل بۇرىن اۋرۋحاناعا ءىشى ءبۇرىپ اۋىرىپ تۇسكەن. الايدا قالاسىنداعى اۋرۋحانا قىزمەتكەرلەرى ەمدەي كەلە، ناۋقاسقا سوقىرىشەك وبىرى دەگەن دياگنوز قويعان. ال بۇل دەرتتەن ايىعۋ - ىلۋدە ءبىر دە كەزدەسپەيدى ەكەن. دارىگەرلەر تونيگە ءبىر ايعا جەتپەي قازا تاباتىنى تۋرالى ايتقان.

اعىلشىندىق «لەستەر» كلۋبىنىڭ دا وتكەن جىلى چەمپيون اتانۋى 3000 كوەفيتسيەنتكە باعالانعان ەدى. ءتىپتى، ودان دا جوعارى بولاتىن. قازىر كلاۋديو رانەري جاتتىقتىراتىن كلۋب چەمپيوندىق اتاققا تالاسىپ كەلەدى.

توني سكەففينگتون اعىلشىن پرەمەر- ليگاسى اياقتالعانشا، ءتىرى بولۋىن تىلەپ ءجۇر ەكەن. قازىرگى تاڭدا وعان ءتۇرلى وتالار جاسالىپ، ءدارى-دارمەكتىڭ ارقاسىندا كورەر تاڭدى كوزبەن اتىرىپ كەلەدى. بىرنەشە كۇن بۇرىن وعان ەڭ اۋىر وتا جاسالىپ، ۇيىنە شىعارىلعان. ال جاعدايى قيىنداي تۇسكەن. دارىگەرلەر اعىلشىن پرەمەر-ليگاسى اياقتالعانشا (ءبىر ايدان استام ۋاقىت) ءتىرى بولسا، ناعىز تاڭعاجايىپ بولار ەدى دەپ توپشىلاپ وتىر...

توني سكەففينگتون «لەستەرگە» تەگىن جانكۇيەر بولىپ جۇرگەن جوق. ونىڭ تەگى يرلاند بولىپ كەلەدى. اكەسى سكەففينگتون ءدال وسى لەستەرشيردە تۇرعان. وتباسىن سوندا قۇرعان. ال توني بولسا تاريحي تۋعان جەرى جايلى ءتۇرلى اڭىزدار مەن ەستەلىكتەردى ەسىتىپ قانا وسكەن. سوندىقتان دا «لەستەرگە» جانكۇيەر بولىپ كەلەدى ەكەن.

- مۇندا سوككەر (فۋتبول) اسا تانىمال ەمەس. مەكتەپتە فۋتبول ويناعاندى ۇناتاتىنمىن. كورشىم اعىلشىندىق «ميدلسبرو» كلۋبىنىڭ جانكۇيەرى بولاتىن. ول ۇلى بريتانيادان سۇيىكتى كومانداسىنىڭ ءتۇرلى سۋۆەنيرلەرىن الدىراتىن. ماعان دا بىردە «لەستەر» كلۋبىنان سىي جاساعان. ىشتەي «تۇلكىلەرگە» تىلەكتەس بولىپ جۇرەتىنمىن، - دەگەن توني ءبىر سۇقباتىندا.

اۋرۋحانادا توني «لەستەر» كلۋبى وينايتىن كۇنى ونىڭ 10-ءنومىرلى جەيدەسىن كيىپ جۇرەدى. سۇيىكتى كومانداسى جەڭىسكە جەتسە، ونى كۇنى بويى شەشپەيدى ەكەن. ەگەر تەڭ ويناسا، كوماندانىڭ تۇزدە كيەتىن جەيدەسىنە اۋىستىرادى. ال «لەستەر» جەڭىلسە، كومانداسىنىڭ وتكەن ماۋسىمدا كيگەن جەيدەسىن كيەدى ەكەن. تاعى ءبىر قىزىعى، تونيدىڭ گاردەروبى اعىلشىندىق كلۋبتىڭ جەيدەلەرىنە تولى. ونىڭ ىشىندە ءوزى ارنايى جاساتقان «مەن اۋستراليادا ءومىر سۇرگەنمەن، جۇرەگىم مەن جانىم «لەستەرگە» بەرىلگەن» دەپ جازىلعان جەيدەسى ەرەكشە مانگە يە. سونداي-اق، ول «لەستەر» كلۋبىنىڭ جاسىل قۇرلىقتاعى فان-كلۋبىن قۇرۋشىلاردىڭ ءبىرى دە. ارينە، دوستارى اراسىندا.

- ءبىزدىڭ قالادا «چەلسي»، «ميۋ» مەن «مانچەستەر سيتي» جانكۇيەرلەرى كوپ. ولار ماعان باسىندا كۇلەتىن. ال قازىر ءبارى وزگەردى، - دەيدى توني.

توني سكەففينگتون «لەستەردىڭ» چەمپيون اتانۋى مۇمكىن ەكەن ماۋسىم باسىندا-اق بولجاعان.

- ماۋسىم باسىندا ايەلىمە «لەستەردىڭ» چەمپيون اتاناتىنىن ايتىپ، ءباس تىگۋىن ءوتىندىم. 2 دوللار قويساڭ جەتەدى دەدىم. ال ول بولسا 20 دوللار قويىپتى. كوەففيتسيەنت 3000 عا تەڭ بولاتىن. جاقىندا بۋكمەكەرلىك ورتالىق حابارلاسىپ، ماۋسىم سوڭىنا دەيىن كۇتتىرمەي، 35000 دوللار بەرەتىنىن ايتتى. مەن كەلىسپەپ ەدىم، ءبىراق ۇيدەگىلەر سونى قاناعات دەپ الدى. ءبىراق، ماعان اقشانىڭ كەرەگى نە؟ ال اقشا ولارعا كەرەك، - دەيدى توني.

توني سكەففينگتون «لەستەر» كلۋبىنىڭ ويىنىن ومىرىندە ءوز كوزىمەن بارىپ كورمەگەن. بارعىسى كەلگەنمەن، قاراجاتى بولماعان. جاقىندا اعىلشىندىق كلۋبتىڭ الەۋمەتتىك جەلىدەگى فورۋمىندا تونيعا كومەك كورسەتەتىن جانكۇيەرلەر تابىلىپ، ونىڭ جولى مەن بيلەتىنىڭ بارلىعى ۇسىنىلعان. الايدا تونيدىڭ دەنساۋلىعى كۇرت ناشارلاپ، دارىگەرلەر الىس جول جۇرۋىنە شەكتەۋ قويعان.

ايگىلى شوتلاند جاتتىقتىرۋشىسى بيلل شەنكلي: «فۋتبول - بۇل ءولىم مەن ءومىردىڭ سۇراعى ەمەس، بۇل ودان دا ماڭىزدىراق!» - دەيدى. بۇل ايتىلعان ءسوز توني سكەففينگتون ءۇشىن جاي ءسوز عانا ەمەس. ونىڭ 16000 شاقىرىمداعى سۇيىكتى كومانداسى گول سوققان سايىن، ول دا ارمانى مەن اجالىنا ءبىر قادام جاقىنداپ كەلەدى...

massaget.kz