الماتىدا «تاۋەلسىزدىك تاعىلىمى» ۇلتتىق جوباسى جاريالاندى
وسىعان بايلانىستى، ق ر ۇلتتىق كىتاپحاناسىندا وتكەن باسپا ءسوز ءماسليحاتىندا ۇيىمداستىرۋشى ۇيىم - «فوتوونەر» قوعامدىق بىرلەستىگىنىڭ پرەزيدەنتى اسىلحان ءابدىرايىم جوبانىڭ ءتورت شارادان تۇراتىندىعىن مالىمدەدى.
«ءبىرىنشى شارا - «ەل ماقتانىشتارى» فوتوكورمەسىندە «حالىق قاھارمانى»، «ەڭبەك ەرى» اتاقتارىنا، سونداي-اق، مادەنيەت، ونەر، عىلىم، ءبىلىم سالالارىندا مەملەكەتتىك سىيلىققا يە بولعان جانە وليمپيادا چەمپيونى اتانعان تۇلعالاردىڭ كەنەپكە تۇسىرىلگەن بىرەگەي فوتوسۋرەتتەرى قويىلادى. كوپشىلىك نازارىنا بارلىعى 90 شاقتى «كارتينالىق» فوتوسۋرەتتەر ۇسىنىلادى. بۇل ءۇشىن ءبىزدىڭ وڭعارباي القاروۆ باستاعان فوتوگرافتارىمىز ەلىمىزدىڭ تۇكپىر-تۇكپىرىنە بارىپ، قازىر ارامىزدا جۇرگەن سول تۇلعالاردى ءتۇسىرىپ قايتتى»، - دەدى ا. ءابدىرايىم.
ەكىنشى شارا - «Turkestan - 2016» حالىقارالىق فوتوەكسپەديتسياسى دەپ اتالادى. وندا قىتايدان جانە تۇركيادان شاقىرىلعان مىقتى فوتوگرافتار، سونداي-اق، قازاقستاننىڭ «National Geographic» جۋرنالىنىڭ فوتوگرافتارىنان قۇرالعان 15 ادام 20-23- مامىر ارالىعىندا تۇركىستان قالاسى، كونە وتىرار، ساۋران شاحارلارى جانە ارىستانباب سەكىلدى تاريحي ورىنداردا بولىپ قايتادى.
ال، الداعى جازدا ءۇش ايعا سوزىلاتىن «مەنىڭ ەلىم - قازاقستان» اتتى فوتوبايقاۋعا كەز كەلگەن ادام قاتىسىپ، ەلىمىزدىڭ تابيعاتى، تاريحي جەرلەرى مەن تاريحي ەسكەرتكىشتەرى، مادەني جەرلەرى، قازاق حالقى مەن باسقا دا ەتنوستاردىڭ سالت-داستۇرلەرىنە قاتىستى فوتولار ءتۇسىرىپ جىبەرە الادى. جىبەرىلگەن فوتولار قىركۇيەك ايىندا ساراپتامادان وتكىزىلەدى.
«تاۋەلسىزدىك تاعىلىمى - 25» دەپ اتالاتىن سوڭعى قورىتىندى فوتوكورمەلىك شارا جەلتوقسان ايىنىڭ باسىندا استانا جانە الماتى قالالارىندا وتكىزىلەدى. وندا قازاقستاننىڭ ەڭ ۇزدىك فوتوجۋرناليستەرى جىبەرگەن 125 فوتوجۇمىستار مەن «مەنىڭ ەلىم - قازاقستان» فوتوبايقاۋىندا جەڭىمپاز دەپ تانىلعان فوتوسۋرەتتەر ۇسىنىلادى. بايقاۋدا ءبىرىنشى ورىن العان جەڭىمپازعا سوڭعى ۇلگىدەگى تەلەديدار، ەكىنشى ورىن يەگەرىنە نوۋتبۋك ال ءۇشىنشى ورىن العان ازاماتقا فوتواپپارات تابىستايمىز»، - دەدى ا. ءابدىرايىم.
ايتا كەتەلىك، «ەل ماقتانىشتارى» فوتوكورمەسى الداعى 12- ءساۋىر كۇنى الماتىداعى ق ر ۇلتتىق كىتاپحاناسىندا، كەيىن 28- ساۋىردە استانادا ۇلتتىق مۇراجايدا وتكىزىلەدى.
اۆتور: ايبوتا جاپپاربەرگەن
