تۇرمەدە وتىرعان اقجارقىن تۇرلىباي قىتاي جانە اعىلشىن تىلدەرىن مەڭگەرىپ العان
بۇل تۋرالى Tengrinews.kz-كە زۋحرا سەيتىموۆانىڭ ءوزى حابارلادى.
ونىڭ ايتۋىنشا، ول سوت زالىندا بەس مينۋتتاي قىزىمەن سويلەسە العان.
«مەن بۇگىن اقجارقىنمەن كورىستىم. بىزگە سوت زالىندا اڭگىمەلەسۋگە بەس مينۋت بەرىلدى. ول جاعدايىنا شاعىمدانىپ جاتقان جوق. التى اي سايىن دارىگەرگە قارالادى ەكەن، كۇنىنە ءۇش رەت تاماقتاندىرادى ەكەن. ءبىزدى ساعىنىپتى، كۇن سايىن تۇسىنە كىرەدى ەكەنبىز. جانۇيامىزبەن تۇسكەن سۋرەتىمىزدى بەردىم. كوزىلدىرىك سۇرادى، كورۋ قابىلەتى ناشارلاپ كەتىپتى. جىلادى»، - دەدى زۋحرا سەيتىموۆا.
سونىمەن قاتار، اناسىنىڭ ايتۋىنشا، اقجارقىن ەسىرتكى كونترابانداسىنا قاتىسى جوق ەكەنىن ايتىپتى. «مۇنى ول سوتتا دا قايتالاپ ايتتى، جۇگىندە ەسىرتكىنىڭ بارىن بىلمەگەن. سوتتاعىلار مۇنى ءتۇسىنىپ وتىرعان سياقتى»، - دەدى ول. ايتۋىنشا، قىزى سوت تىڭداۋى كەزىندە قىتاي تىلىندە سويلەگەن. اناسىنىڭ ايتۋىنشا، اقجارقىن 2 جىلدىڭ ىشىندە اعىلشىن جانە قىتاي تىلدەرىن ۇيرەنىپ الىپتى.
«قازاقستاننىڭ س ءى م قىزمەتكەرلەرى وعان ءجيى بارىپ تۇرادى. ول ءبىزدىڭ قولداۋىمىزدى سەزىنەدى، ءوز- وزىنە سەنەدى، بارلىعى جاقسى بولادى دەيدى»، - دەدى زۋحرا سەيتىموۆا.
ال اقجارقىن تۇرلىباي قامالعان تەرگەۋ يزولياتورىندا تۋىستارىمەن كورىسۋگە تىيىم سالىنعان.
