بالام جاقسى ادامداردىڭ ورتاسىندا ءجۇرسىن دەسەڭىز

استانا. قازاقپارات - ەشكىمنىڭ سىرتىنان عايبات ايتپايتىن، كىممەن جاناسسا دا سونىڭ جاقسى جاعىن جانە جاقسىلىعىن كورىپ جۇرەتىن ءبىر تانىسىمنىڭ مىنەزىنە قايران قالۋشى ەدىم.

ول ءتىپتى كەيبىر جۇرت جامانعا شىعارىپ تاستاعان ادامدارمەن ارالاسسا دا، «پالەننىڭ جومارتتىعىن ايتساڭشى، تۇگەننىڭ ادالدىعىن- اي!» دەپ الگى «ىسكە العىسىز» دەلىنگەن ادامداردى ساعىندىراتىنى بار.

جاقىندا سول ازاماتتىڭ وسى مىنەزىنىڭ سىرىن ۇققانداي بولدىم.

ۇيىنە بارعام. جاستارى جەتپىستەن اسقان اتا- اناسى بار ەكەن. اناسى اڭگىمەشىل، بالاسىنىڭ دوستارىمەن ءتىپتى جاقىن تارتىپ شۇيىركەلەسكەندى ۇناتادى ەكەن. اڭگىمە ارەدىگىندە بالا تاربيەسى جونىندە ءبىر- ەكى اۋىز ءسوز ايتىپ قالدى. قالاي تابيەلەگەن دەيسىز عوي؟

«ۇيدە بەس بالا بولدى، قانشا دەگەنمەن بالا ەمەس پە؟ سىرتتان، «اناۋ ءسۇيتتى، مىناۋ ءبۇيتتى» دەپ ءبىر-ءبىرىن جامانداپ كەلەدى. كورشىنىڭ بالالارى دا تارتىپسىزدەر قاتارىنا قوسادى. ول بالانىڭ: «مەن تارتىپسىزدىك جاسامادىم» دەگەن ىشكى اقتالۋى عوي. سودان مەن بۇلاردىڭ مۇنداي ارەكەتتەرىنەن كادىمگىدەي شوشىندىم. ءبىر كۇنى وتاعاسىعا ايتتىم. «بۇلار وسىلاي كەتە بەرسە كەيىن اينالاسىندا جاقسى ادام قالمايتىن شىعار»، دەدىم. سودان اقىلداسىپ، امالعا كوشتىك. بالالارعا تاپسىرما بەردىم. «سەن بەكتايدىڭ ءۇش جاقسى قاسيەتىن ايت، ساعان ءۇش كامپەت بەرەم» دەپ نۇرسۇلۋعا، «نۇرسۇلۋدىڭ بەس جاقسى قاسيەتىن ايتساڭ ساعان كامپەت بەرەم» دەگەن سەكىلدى تالاپتار قويىپ سىيلىق بەرۋدى باستادىم. ونسىزدا جەيتىن كامپەتتەرى عوي، سودان بۇلار ءبىر-ءبىرىنىڭ جاقسى جاقتارىن سانامالاپ تۇرىپ ايتاتىن بولدى. «ول ءۇي جيناۋعا كومەكتەسەدى، ول ءۇي تاپسىرماسىن ۋاقىتىندا ورىندايدى، ول اكە سىرتتان كەلگەندە امانداسادى» دەگەندەي. كەيبىر كەزدە ازداپ وتىرىك تە ماقتاپ جىبەرەدى. وندايدا تويتارىس بەرەم. «جوق، بۇلاي ەمەس، بىلاي شىعار» دەپ كومەكتەسەم. قىزىق بولعاندا ءبىر اي وتەر-وتپەستە بۇلار ماڭىنداعى ادامداردىڭ جاقسى قىرلارىنا ۇڭىلە باستادى. ءبىزدىڭ ءۇي جاقسى ادامدارعا تولىپ كەتتى. (كۇلىپ) كورشىنىڭ بالالارىن دا ماقتاسا سىيلىق بەرىپ وتىردىم. كەيىن سىيلىقسىز- اق ماڭىنداعى بالالاردىڭ، ۇلكەندەردىڭ جاقسى قاسيەتتەرىن ايتىپ وتىراتىن بولدى. وزدەرى سونداي بولۋعا ۇمىتىلادى عوي سودان كەيىن. شۇكىر، وسكەندە، سودان جامان بولعان جوق. ادام بويىندا جاقسىلىق تا، جاماندىقتا بار عوي، جاقسى جاعىن كورسەڭ جاقسى مامىلە جاساساسىڭ، سەن جاقسى مامىلە جاساساڭ ونىڭ قايتارىمى تەك جاقسىلىق قوي شىراعىم. ال، ءبىر جاقسىلىعىن كورىپ جامان ادامدارعا دا سەنىپ قالۋعا بولمايدى. ونى ادامنىڭ اقىلى ەكشەيدى عوي»، - دەيدى اپامىز.

مىنە، ەلدىڭ جاقسى بولماعى سەنىڭ جاقسى بولماعىڭنان ەكەن. بالام جاقسى بولسىن دەسەڭ، باسقالاردىڭ جاقسى جاعىن كورسەتە ءبىل. وكىنىشكە قاراي، كوپ اتا-انا ولاي تاربيەلەمەيمىز. وزگەنىڭ بالاسىن جامانداۋدى ۇيرەتەمىز. ءتىپتى ءوز بالاسىنا تاماق ىشكىزۋ ءۇشىن «پالەندى قاراشى، تاماق ىشپەي كۇشى جوق بولىپ قالىپتى، مەنىڭ بالام تاماعىن تاۋىسىپ قويادى» نەمەسە «پالەننىڭ بالاسى جىلاۋىق، مەنىڭ بالام جىلامايدى» دەپ ايدالاداعى مۇراتتى، جاناردى جاماندايتىن اتا-انا قانشاما!؟ مۇنداي سوزدەردى جاستايىنان كۇندە ەستىپ وسكەن بالا ەسەيىپ، كۇردەلى ورتالارمەن قارىم-قاتىناسقا تۇسكەن كەزدە بىردەن كىسىنىڭ جاقسىلىعىن كورگىش بولا قالمايدى عوي. قالىپتاسقان بولمىس-مىنەزىمەن ورتاعا شىعادى. سول كەزدە ونىڭ ويكوزى ادامداردىڭ جامان قىرلارىن ءدوپ بايقاعىش بولادى ەكەن. «اناۋ انانداي، مىناۋ مىنانداي». ىلعي دا كىسىنىڭ جامان جاقتارىن كورىپ تۇراتىن ادام ءۇشىن ولاردىڭ جاقسى قاسيەتتەرىن شاڭ باسىپ نەمەسە كومىلىپ قالا بەرەدى. سوندىقتان دا ولارمەن جاقسى قارىم-قاتىناس قۇرا المايدى. ەندى، «اينالا تۇگەل انتۇرعان». ءومىر ءسۇرۋ اۋىرلاي بەرمەك.

ۇلاربەك نۇرعالىم ۇلى،

zNamys.k