ءسابيناعا سەنىم ارتامىز
بۇل جارىستا ءار قۇرلىقتان كەلگەن 26 سپورتشى باق سىنايدى.
كوركەم گيمناستيكا جايىندا اڭگىمە قوزعالعاندا، قازاقستاندىق جانكۇيەرلەردىڭ، ەڭ ءبىرىنشى كەزەكتە، نەللي كيمنىڭ ەسىمىن ەسكە الۋى زاڭدى. شىمكەنتتە تۇرىپ، تانىمال باپكەر ۆلاديمير ءبايديننىڭ قول استىندا جاتتىققان ول سپورتتىڭ بۇل ءتۇرى بويىنشا بيىك بەلەستەردىڭ بارلىعىن باعىندىردى. 1976 -جىلى مونرەال جانە 1980 -جىلى ماسكەۋ وليمپياداسىن قوسا العاندا، جەرلەسىمىز 5 التىن جانە 1 كۇمىس مەدالدى ولجالادى. الەم چەمپيوناتىندا 5 رەت التىن تۇعىرعا كوتەرىلىپ، 6 مارتە جۇلدەگەرلەر ساناتىنا قوسىلدى. ارينە، بۇل - وتە كەرەمەت كورسەتكىش.
تاۋەلسىزدىك العاننان كەيىن ءاليا يۋسۋپوۆانىڭ جولىنا ۇلكەن ۇمىتپەن قارادىق. قازاقتىڭ سۇلۋى نەلليدىڭ دەڭگەيىنە جەتپەگەنىمەن، ونىڭ دا باعىندىرعان بەلەستەرى از ەمەس. ءاليا - ازيا ويىندارى مەن ازيا چەمپيوناتتارىنىڭ ابسوليۋتتى چەمپيونى اتاندى، كوپتەگەن حالىقارالىق جارىستاردا جۇلدە الدى. قوس بىردەي وليمپيادا ويىندارىنا قاتىسىپ، افينىدا - 4, بەيجىڭدە 5-ورىندى يەلەندى.
وكىنىشكە قاراي، وتاندىق كوركەم گيمناستتار سوڭعى كەزدەرى ءوز جانكۇيەرلەرىن قوماقتى تابىستارىمەن قۋانتا الماي كەلەدى. ماسەلەن، لوندون وليمپياداسىندا اننا اليابيەۆا بار- جوعى 15-ورىندى قاناعات تۇتتى. الەم چەمپيوناتىندا دا ءبىزدىڭ قىزدار قالىڭ توپتىڭ اراسىندا قالىپ قويدى. باسقا دا بايراقتى باسەكەلەردە جارىتىپ ونەر كورسەتە الماي جۇرگەنىمىزگە ءدۇيىم جۇرت كۋا.
ريو دە جانەيرو وليمپياداسىنىڭ الاۋى تۇتانۋىنا نەبارى ءتورت ايعا جۋىق ۋاقىت قالدى. الايدا كوركەم گيمناستتارىمىزدىڭ قورجىنى ءالى بوس. سول ولقىلىقتىڭ ورنىن برازيليادا وتەتىن ليتسەنزيالىق تۋرنيردە تولتىرۋعا ءتيىسپىز. بۇل جارىستا قازاق ەلى نامىسىن ءسابينا اشىربايەۆا قورعايدى. ول 1998 -جىلى شىمكەنتتە تۋىپ- ءوسىپ، سول جەردە وسى سپورت ءتۇرىنىڭ قىر- سىرىنا قانىقتى. بۇل كۇندەرى ءسابينا قازاقستان ۇلتتىق قۇراماسىنىڭ باس باپكەرى ءاليا يۋسۋپوۆانىڭ قول استىندا جاتتىعۋدا.
- ءسابينا - وتە دارىندى قىز. بۇل تەك مەنىڭ عانا پىكىرىم ەمەس. قازاقستاندىق سپورتشىنىڭ ونەرىن كورگەن كوپتەگەن مامانداردىڭ وزدەرى دە سونى مويىنداپ وتىر. ارا-تۇرا ءبىز ماسكەۋگە ارنايى ات باسىن بۇرىپ، يرينا ۆينەردىڭ الدىنان وتەمىز. ايگىلى باپكەر اركەز اقىل-كەڭەستەرىن بەرىپ تۇرادى. ول كىسى دە اشىربايەۆانىڭ الەۋەتىن جوعارى باعالاپ وتىر. وعان مەنىڭ الىپ-قوسارىم جوق. قازىرگى ماقساتىمىز - وليمپيادا جولداماسىنا يەلىك ەتۋ. ەگەر وسى جوسپار جۇزەگە اسسا، ءبىر ارمانىمىز ورىندالار ەدى، - دەيدى ءاليا حانىم.
برازيلياداعى تۋرنيردە 26 سپورتشىنىڭ باق سىنايتىنىن جوعارىدا ايتتىق. سولاردىڭ اراسىنان ۇزدىك شىققان التى ارۋ بيىلعى جىلى وتەتىن وليمپيادا ويىندارىنا قاتىسۋ قۇقىعىنا يە بولادى.
عالىم سۇلەيمەن
«ايقىن»
