ايگىلى فرانسۋز اكتەرى ا. مۇحامەدي ۇلىمەن كەزدەسۋدە قازاقستاندا وپەرا قويۋعا نيەت ءبىلدىردى - فوتو

استانا. قازاقپارات - بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى ايگىلى فرانسۋز اكتەرى جەرار دەپاردەمەن كەزدەستى، بۇل تۋرالى مينيسترلىكتىڭ باسپا ءسوز قىزمەتى حابارلادى.

ۆەدومستۆو باسشىسى جانە 200 دەن اسا كينوفيلمدەر كەيىپكەرىنىڭ كەزدەسۋى دوستىق اڭگىمە رەتىندە ءوتتى.

ايگىلى اكتەردى قارسى الا وتىرىپ، ارىستانبەك مۇحامەدي ۇلى ج. دەپاردەنىڭ قاتىسۋىمەن تۇسىرىلگەن فيلمدەر بارشا قازاقستاندىقتارعا تانىمال، ال وتاندىق «كۇزگى ماحاببات» جانە «دالا داۋىسى» كينولەنتالارى شەتەلدە دە كەڭىنەن كورسەتىلگەندىگىن ايتىپ ءوتتى.

«بارلىعىمىز دا ءسىزدىڭ ناتاليا ورىنباساروۆامەن بىرگە تۇسكەن «كۇزگى ماحاببات» كينوسىن جاقسى بىلەمىز. بۇل وتە مەيىرىمدى فيلم اۋىل بولمىسى تۋرالى باياندايدى. ودان باسقا بىرلەسىپ ىسكە اسىرعان وزگە شىعارماشىلىق جوبالارىمىز بار»، - دەدى مينيستر.

ارىستانبەك مۇحامەدي ۇلى قازاقستان- فرانسيا شىعارماشىلىق ىنتىماقتاستىعى الداعى ۋاقىتتا دا دامىپ، جالعاسىن تاباتىندىعىنا سەنىم ءبىلدىردى.

سونىمەن قاتار ول بولاشاققا دەگەن شىعارماشىلىق جوسپارلارىمەن ءبولىستى. فرانسۋز اكتەرى الداعى ۋاقىتتا قازاقستاندا وپەرا قويۋعا نيەتىن ءبىلدىردى.

«مەن وپەرادا بىرنەشە رەت ويناپ، ونى قويۋعا قاتىسقان ەدىم. قازاقستاندا ادامدار كلاسسيكالىق مۋزىكانى ءسۇيىپ تىڭدايدى، بۇل جەردە دارىندى وپەرا انشىلەرى دە وتە كوپ. قازاقستاندا شىعارماشىلىقپەن اينالىسۋعا مۇمكىندىك مول»، - دەپ ءبولىستى ول.