كەمبريدج پروفەسسورى: «قۇران ءتاپسىر» قولجازباسى سەنساتسياعا اينالۋى مۇمكىن
پروفەسسوردىڭ ايتىپ وتىرعانى - مۇسىلمانداردىڭ قاسيەتتى كىتابى قۇران كارىمگە تۇسىنىك بەرەتىن - «قۇران ءتاپسىرى» قولجازباسى. فيرۋزا مەلۆيلل بۇل كىتاپتىڭ نەشە عاسىردان بەرى ساقتالىپ كەلە جاتقانىن ءالى زەرتتەۋ كەرەك دەيدى. الايدا، كىتاپتىڭ قاعازىنا، جازۋ مەن ەسكى قولجازبانىڭ تاڭباسىنا قاراپ، «قۇران ءتاپسىردىڭ» وتە ەرتەدەگى كىتاپ ەكەنىن ايتۋعا بولادى. فيرۋزا مەلۆيلل مەن كەمبريدج ۋنيۆەرسيتەتىنىڭ تاعى ءبىر قىزمەتكەرى، پروفەسسور، تاريحشى چارلز پەتەر كىتاپتى مۇقيات زەرتتەيدى.
«بۇل كىتاپحانادا تۇرعان «قۇران ءتاپسىرى» - بۇل ءسوزسىز تاماشا ەڭبەك. بۇنىڭ ءوزى جاڭالىق. كىتاپتى ابدەن زەرتتەي الامىز دەگەن سەنىمدەمىن. ماعان الدىن الا كىتاپتىڭ ءبىر- ەكى بەتىن سۋرەتكە ءتۇسىرىپ، جىبەرگەن ەدى، مەن ول سۋرەتتەردى قاناعات تۇتپاي، قۇندى قولزاجبانى ءوز كوزىممەن كورۋگە كەلدىم»، - دەيدى ول.
پارسى ءتىلىن زەرتتەۋشى پروفەسسوردىڭ ايتۋىنشا، كىتاپتىڭ بەتتەرى شاتاسقان، سوندىقتان، ەڭبەكتى قالپىنا كەلتىرۋمەن قاتار، ونىڭ رەتتىك بەتىن انىقتاۋ كەرەك.
«سودان كەيىن بۇل كىتاپقا قاتىستى جاقسى پىكىر جازىلادى دەپ ويلايمىن. جوبا عىلىمدا ءوزىنىڭ لايىقتى ورنىن تابۋ كەرەك»، - دەيدى پروفەسسور.
ايتا كەتەيىك، فيرۋزا مەلۆيلل قازاقستانعا قازاقستانداعى بريتانيا ەلشىلىگىنىڭ قولداۋىمەن مادەنيەت جانە سپورت مينيسترلىگىنىڭ، ۇلتتىق اكادەميالىق كىتاپحانانىڭ شاقىرۋىمەن كەلىپ وتىر. پروفەسسوردىڭ ساپارى ۇلتتىق كىتاپحانانىڭ «بۇل كىتاپ الەمى...» اتتى ايلىق شاراسى اياسىندا ۇيىمداستىرىلعان.
اۆتور: كەنجەكەي توقتامۇرات قىزى
