گۇلشارا ءابدىقالىقوۆا: قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە وزەكتى ماسەلەلەردى شەشۋدە ايتارلىقتاي ۇلەس قوسۋعا دايار - فوتو
قازاقستان مەن ب ۇ ۇ اراسىنداعى ىنتىماقتاستىق قارقىندى دامىپ كەلە جاتقاندىعىنا توقتالعان مەملەكەتتىك حاتشى: «2015-جىلى ب ۇ ۇ باس حاتشىسى پان گي مۋننىڭ قازاقستانعا ساپارىن جوعارى باعالايمىز. بۇل ساپار مازمۇندى بولعانىن اتاپ وتكەن ءجون. ق ر پرەزيدەنتى نۇرسۇلتان نازاربايەۆ ب ۇ ۇ تاراپىمەن ءوزارا قاتىناستارعا ەرەكشە نازار اۋدارىپ وتىرعاندىعىن جاقسى بىلەسىزدەر»، - دەدى.
سونىمەن قاتار، گ. ءابدىقالىقوۆا بيىلعى ماۋسىمدا قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە سايلانعان جاعدايدا ادامزات الدىنداعى ماسەلەلەردى شەشۋدە ايتارلىقتاي ۇلەس قوسۋعا، سونىمەن قاتار ورتالىق ازيا ءوڭىرىنىڭ ماسەلەلەرىنە حالىقارالىق قاۋىمداستىقتىڭ نازارىن بەلسەندى تارتۋعا دايىن ەكەنىن ايتتى.
مەملەكەتتىك حاتشى «قازاقستان-2050» ستراتەگياسىنىڭ، «نۇرلى جول - بولاشاققا باستار جول» مەملەكەتتىك باعدارلاماسى جانە بەس ينستيتۋتسيونالدى رەفورمالاردىڭ نەگىزگى باعىتتارى ب ۇ ۇ باس حاتشىسىنىڭ بەسجىلدىق ءىس-قيمىل باعدارلاماسىنىڭ باسىمدىقتارىمەن، مىڭجىلدىق دامۋ ماقساتتارىمەن جانە ب ۇ ۇ- نىڭ تۇراقتى دامۋ ماقساتتارىمەن ۇيلەسىمدى ەكەندىگىن جەتكىزدى.
كەزدەسۋ سوڭىندا گ. ءابدىقالىقوۆا تۇراقتى وكىل نوريماسا شيمومۋراعا قازاقستان مەن ب ۇ ۇ دامۋ باعدارلاماسى اراسىنداعى ديالوگتى جانە ءوزارا تۇسىنىستىكتى نىعايتۋداعى جۇمىستارىنا تابىس تىلەدى.
