وزبەكستان قازاقستانداعى قىلمىسكەرلەرىن قايتارىپ الماي وتىر

استانا. قازاقپارات - وزبەكستان بيلىگى قازاقستان باس پروكۋراتۋراسىنىڭ سوتتالعان وزبەكستاندىقتاردى وتانىنا قايتارىپ الۋ جونىندەگى سۇراۋىنا وڭ جاۋاپ بەرمەي كەلەدى. قازىرگى ۋاقىتتا قازاقستاندا 643 وزبەك ازاماتى جازاسىن وتەپ جاتىر.

«بىزگە وزبەكستان ازاماتتارىنان سوتتالعانداردى ەلدەرىنە قايتارۋ جونىندە وتە كوپ ءوتىنىش تۇسەدى، ءبىراق وكىنىشكە قاراي بۇل تەك بىزگە بايلانىستى ەمەس، قابىلداۋشى تاراپقا بايلانىستى. ءبىز كەلگەن حاتتاردىڭ بارلىعىن وزبەكستانعا جىبەرەمىز. الايدا وڭ جاۋاپ المايمىز»، - دەيدى قازاقستان باس پروكۋراتۋراسىنىڭ ءبىرىنشى ورىنباسارى يوگان مەركەل.

بۇگىندە قازاقستاندا 1,5 مىڭ شەتەل ازاماتى (1509) جازاسىن وتەپ جاتىر. ولاردىڭ 643 ءى وزبەكستان جانە 320 سى قىرعىزستان ازاماتى.

مەركەلدىڭ سوزىنشە، سوڭعى جىلدارى قىرعىزستانعا 26 سوتتالۋشىنى قايتارعان، ال وزبەكستان بىردە-بىرەۋىن قابىل الماعان.

Baq.kz