استانا ازەربايجان- ارمەنيا قاقتىعىسىنا بايلانىستى ارمەنيادا وتەتىن جينالىستى باسقا ەلدە وتكىزۋدى ۇسىنعان

استانا. قازاقپارات - قازاقستاننىڭ ە ا ە و ۇكىمەت باسشىلارى سامميتىن ەريەۆاننان باسقا قالادا وتكىزۋ ۇسىنىسىنا رەسەي «كەلىسۋگە دايىن». ساراپشى «قازاقستان وكىلدەرى ەريەۆانعا بارسا، باكۋ ونى ارمەنيانى قولداۋ دەپ تۇسىنەدى» دەيدى.

ەۋرازيا ەكونوميكالىق وداعى (ە ا ە و) ۇكىمەت باسشىلارى ءسامميتى ءساۋىردىڭ 8- كۇنى ەريەۆان (ارمەنيا استاناسى - رەد.) قالاسىندا وتەدى دەپ تاۋلى قاراباقتاعى 2- ءساۋىردە باستالعان ازەربايجان- ارمەنيا قاقتىعىسىنا دەيىن جوسپارلانىپ قويعان بولاتىن.

«ءماسىموۆ ەرەۆانعا بارمايدى»

الايدا بۇگىن قازاقستان پرەمەر- ءمينيسترى كارىم ءماسىموۆتىڭ ەرەۆانعا بارمايتىنى حابارلاندى. مۇنى «ازاتتىققا» پرەمەر- مينيستر كەڭسەسى باسپا ءسوز قىزمەتى جەتەكشىسىنىڭ ورىنباسارى دۋمان حاميت راستاعانىمەن، «ازىرگە ساپاردان باس تارتۋ سەبەبىن ايتا المايتىنىن» ءبىلدىردى.

ال رەسەي ۇكىمەتىنىڭ رەسمي سايتىندا پرەمەر- مينيستر دميتري مەدۆەديەۆتىڭ ارمەنياعا ساپارىن شەگەرمەيتىنى، ءساۋىردىڭ 7- كۇنى - ەريەۆانعا (ارمەنيا)، ال كەلەسى، ياعني ەريەۆاندا ە ا ە و ۇكىمەت باسشىلارى ءسامميتى ءوتۋى ءتيىس بولعان ءساۋىردىڭ 8- كۇنى باكۋگە (ازەربايجان) باراتىنى حابارلاندى.

وسى اقپاراتتا دميتري مەدۆەديەۆتىڭ ارمەنيا پرەمەر- ءمينيسترى وۆيك ابرااميانمەن تەلەفون ارقىلى سويلەسەتىنى، ابرااميانعا «قالىپتاسقان جاعدايعا بايلانىستى رەسەيدىڭ ەۋرازيا ۇكىمەت ارالىق كەڭەسىندە ءتوراعالىق ەتىپ وتىرعان قازاقستاننىڭ ە ا ە و سامميتىن ماسكەۋگە، كەلەسى اپتاعا اۋىستىرۋ ۇسىنىسىنا كەلىسۋگە دايىن ەكەنىن حابارلايتىنى» جازىلعان.

رەسەي ۇكىمەتىنىڭ سايتىندا پرەمەر دميتري مەدۆەديەۆ پەن ارمەنيا ۇكىمەتىنىڭ باسشىسى وۆيك ابراامياننىڭ قازاقستاننىڭ ە ا ە و سامميتىن ماسكەۋگە اۋىستىرۋ تۋرالى ۇسىنىسىن تالقىلاعانى دا حابارلاندى.

كەيبىر رەسەيلىك ب ا ق- تىڭ جازۋىنشا «ە ا ە و سامميتى قاراباق قاقتىعىسىنا بايلانىستى شەگەرىلگەن». ر ب ك باسىلىمى دميتري مەدۆەديەۆتىڭ باسپا ءسوز حاتشىسى ناتاليا تيماكوۆاعا سىلتەمە جاساي وتىرىپ، قازاقستاننىڭ ە ا ە و سامميتىن ماسكەۋدە وتكىزۋ ۇسىنىسىن رەسەيدىڭ قابىل العانىن حابارلادى.

ساراپشى پىكىرى

 قازاقستاندىق ساياساتتانۋشى راسۋل جۇمالى ەريەۆانداعى سامميتتى باسقا قالاعا اۋىستىرۋدى «دۇرىس شەشىم» دەپ باعالاپ، مۇنىڭ قازاقستاننىڭ ديپلوماتيالىق ۇسىنىسى ەكەنىن ايتادى.

- قازاقستان ە ا ە و ءتوراعاسى رەتىندە سامميتتىڭ وتكىزۋ ۋاقىتىن، ورنىن وزگەرتۋگە ۇسىنىس جاساۋعا تولىق قۇقىلى. سامميتكە قاتىستى وزگەرىستەر تاۋلى قاراباقتاعى جاعدايعا بايلانىستى ەكەنى انىق. ەگەر سامميت ەريەۆاندا وتسە، قاتىسقان ەلدەر تاۋلى قاراباق [قاقتىعىسى] جاعدايىندا ارمەنياعا قولداۋ بىلدىرگەن بولىپ كورىنەدى. ازەربايجان - ساياسي جانە ەكونوميكالىق تۇرعىدا قازاقستانعا الدەقايدا جاقىن، سەرىكتەس ەل. سوندىقتان قازاقستان [ۇكىمەتى] دەلەگاتسياسى ەريەۆانعا بارعان جاعدايدا ازەربايجان ول ساپاردى ارمەنياعا قولداۋ دەپ قابىلداۋى مۇمكىن ەدى، - دەيدى ول.

ارمەنيا مەن ازەربايجاننىڭ اراسىنداعى داۋلى ايماق - تاۋلى قاراباقتاعى جاعداي ءساۋىردىڭ 2-ىنە قاراعان ءتۇنى كۇرت شيەلەنىسكەن ەدى. تاراپتار اتىستى توقتاتۋ كەلىسىمىن بۇزدى دەپ ءبىر- ءبىرىن ايىپتادى. قارۋلى قاقتىعىس كەزىندە ەكى تاراپتان دا ونداعان ادام قازا تاۋىپ، جۇزدەگەن ادام جارالانعانى حابارلاندى.

 استانا تاۋلى قاراباقتاعى جانجال ايماعىندا ادامداردىڭ قازا بولۋىنا الاڭداۋشىلىق ءبىلدىرىپ، تاراپتاردى ۇستامدى بولۋعا جانە اتىستى توقتاتۋ تۋرالى ۋاعدالاستىقتاردى قاتاڭ ساقتاۋعا شاقىرادى.

 ە ا ە و- عا رەسەي، قازاقستان، بەلارۋس، قىرعىزستان جانە ارمەنيا مۇشە.

«ازاتتىق» جاڭالىقتارى