ەلباسى باستامالارى تۇركيا باسىلىمىندا جارىق كوردى
وندا الەم كوشباسشىلارىنىڭ باياندامالارىنان ءۇزىندى كەلتىرىلىپ، قابىلدانعان ورتاق قارار جارىق كورگەن. اسىرەسە، باسىلىم نۇرسۇلتان نازاربايەۆتىڭ يادرولىق قارۋسىز الەم قۇرۋدا كوتەرگەن ماڭىزدى باستامالارىنا توقتالىپ، 25 جىلدىڭ اياسىندا قازاق ەلىنىڭ حالىقارالىق قاۋىمداستىققا قوسقان ۇلەسىن كەڭىنەن سارالاعان.
كۇن سايىن 20 مىڭ تيراجبەن جارىق كورەتىن، عالامتوردا 80 مىڭ تۇراقتى وقىرمانى بار رەسپۋبليكالىق باسىلىم 2010-جىلى نۇرسۇلتان نازاربايەۆتى بەيبىتشىلىك سالاسىنداعى نوبەل سىيلىعىنا ۇسىنعان بولاتىن.
باسىلىمنىڭ باس رەداكتورى كەمال ساللى: «قازاق پرەزيدەنتىن الەمدىك دەڭگەيدەگى كوشباسشى جانە تۇركى دۇنيەسىنىڭ ۇلى تۇلعاسى» دەپ ەسەپتەيدى.
«نۇرسۇلتان نازاربايەۆ تاۋەلسىزدىكتىڭ العاشقى جىلدارىندا-اق ەل ىشىندەگى يادرولىق جاپپاي قىرىپ-جويۋ قارۋىنان باس تارتىپ، دۇنيەجۇزىنە ءوزىن بەيبىت سۇيگىش، ديالوگقا اشىق، كورەگەن ساياساتكەر رەتىندە تانىتا ءبىلدى. سودان بەرى بۇكىل حالىقارالىق قاۋىمداستىق ونىڭ عالامدىق قاۋىپسىزدىك ءۇشىن جاساعان باتىل قادامىن ۇلگى تۇتىپ، كوتەرگەن باستامالارىنا قولداۋ ءبىلدىرىپ كەلەدى. نازاربايەۆتىڭ تىڭ يدەياسى تەك ءبىر ۇلتتىڭ نە ايماقتىڭ عانا مۇددەسىن كوكسەمەيدى، بۇكىل ادامزات قوعامى ءۇشىن ۇلكەن مانگە يە»، - دەيدى «ونجە ۆاتان» گازەتىنىڭ باس رەداكتورى كەمال ساللى.
