ولجاس سۇلەيمەنوۆكە اتاتۇرىك اتىنداعى ۋنيۆەرسيتەتتىڭ قۇرمەتتى دوكتورى اتاعى بەرىلدى
«بۇل اتاق وعان مادەنيەت ارالىق ديالوگتى دامىتۋعا، حالىقتار دوستىعىن نىعايتۋعا سىڭىرگەن ەڭبەكتەرى جانە تۇركولوگيا سالاسىنداعى كوپجىلعى جەمىستى زەرتتەۋلەرى ءۇشىن بەرىلدى»، - دەلىنگەن ق ر- نىڭ تۇركياداعى ەلشىلىگىنىڭ حابارلاماسىندا.
سالتاناتتى ءراسىم اقىننىڭ، ديپلوماتتىڭ جانە عالىمنىڭ الداعى جاقىنداپ كەلە جاتقان 80 جاسقا تولۋى مەرەيتويىنا ورايلاستىرىلدى. وعان قازاقستاننىڭ تۇركياداعى ەلشىسى جانسەيىت تۇيمەبايەۆ، تۇركىسوي حالىقارالىق تۇركى الەمى مادەنيەتى ۇيىمىنىڭ باس حاتشىسى دۇيسەن قاسەيىنوۆ، ەرزۋرۋم گۋبەرناتورى احمەت التىپارماق، سونداي- اق تۇركيانىڭ قوعام جانە مادەنيەت قايراتكەرلەرى، جۋرناليستەر، ۋنيۆەرسيتەت وقىتۋشىلارى مەن ستۋدەنتتەرى قاتىستى.
اتاتۇرىك اتىنداعى ۋنيۆەرسيتەتتىڭ رەكتورى ح. كوچاك ءوز سوزىندە اقىن و. سۇلەيمەنوۆتىڭ تۇركى الەمىنىڭ مادەنيەتى مەن ونەرىنە، عىلىمى مەن ادەبيەتىنە قوسقان ۇلەسى، سونداي- اق ونىڭ تۇركى كەڭىستىگىندە بىرلىك پەن ىنتىماقتاستىقتى نىعايتۋ جانە ساقتاۋ جونىندەگى قىزمەتى تۋرالى ەگجەي- تەگجەيلى ايتىپ بەردى.
«ۋنيۆەرسيتەت كەڭەسىنىڭ شەشىمىمەن و. سۇلەيمەنوۆكە تۇركى مادەنيەتىنە، سونداي- اق وتكەننىڭ ورتاق رۋحاني قۇندىلىقتارىن تۇلەتۋگە، تۇركى الەمنىىڭ كوشپەلى زاماننان ەجەلگى مادەنيەتىنە دەيىنگى تۇركى تاريحىن زەردەلەۋگە قوسقان وراسان ۇلەسى ءۇشىن قۇرمەتتى دوكتور ديپلومىن تاپسىرۋ تۋرالى شەشىم قابىلداندى»، - دەدى ح. كوچاك.
ەرزۋرۋم قالاسىنىڭ گۋبەرناتورى ا. التىپارماق پروۆينتسيا تۇرعىندارى اتىنان ءوز قۇتتىقتاۋىن جەتكىزدى: «ءبىر زامانداردا ورىستىڭ ۇلى اقىنى ا. پۋشكين ەرزۋرۋمعا كەلىپ، «ارزرۋمعا ساياحات» دەگەن كىتابىن جازعان بولاتىن. بۇگىن تۇركى دۇنيەسىنىڭ ماقتانىشىسى اقىن و. سۇليەمەنوۆ تە ءبىزدىڭ قالامىزدا بولىپ، ءبىزدى جاڭا لەپپەن قاناتتاندىردى».
تۇركىسوي باس حاتشىسى د. قاسەيىنوۆ ۋنيۆەرسيتەتتىڭ قازاق جازۋشىسىنا قۇرمەتى - بۇكىل قازاقستانعا قۇرمەتىنىڭ كورىنىسى دەپ اتاپ كورسەتىپ، تۇركىسوي اتىنان ءوزىنىڭ زور ريزاشىلىعىن ءبىلدىردى.
ەلشى ج. تۇيمەبايەۆ و. سۇلەيمەنوۆتىڭ قازاقستان رەسپۋبليكاسىنىڭ تاۋەلسىزدىگىن نىعايتۋعا قوسقان زور ۇلەسى تۋرالى ايتا كەلىپ، اقىننىڭ ديپلوماتيالىق قىزمەت سالاسىنداعى جەمىستى ءجۇمىسىن اتاپ ءوتتى، قازاقستان اتىنان ەرزۋرۋم قالاسى اكىمشىلىگى مەن ۋنيۆەرسيتەتىنە ۇلكەن ريزاشىلىعىن جەتكىزدى.
و. سۇلەيمەنوۆ سالتانات اياسىندا تۇرىك حالقىنا العىسىن ايتتى جانە تۇركى حالىقتارىنىڭ بىرلىگى مەن ىنتىماقتاستىعىن ساقتاۋعا شاقىردى.
اتاپ وتەيىك، اتاتۇرىك اتىنداعى ۋنيۆەرسيتەت، تۇركياداعى ءىرى وقۋ ورىندارىنىڭ ءبىرى، وندا 23 فاكۋلتەتتە 25 مىڭ ستۋدەنت ءبىلىم الادى.
