جامبىل وبلىسىنىڭ دەلەگاتسياسى قىتاي حالىق رەسپۋبليكاسىنا بارادى
جامبىل وبلىسى اكىمدىگىنىڭ باسپا ءسوز قىزمەتىنەن حابارلاعانداي، ايماق باسشىسى كارىم كوكىرەكبايەۆ باستاعان دەلەگاتسيا جۇمىس ساپارىمەن قىتاي حالىق رەسپۋبليكاسىنىڭ سانجى حۇيزۋ اۆتونوميالىق وبلىسىنا بارادى.
ساپاردىڭ ماقساتى - تاراز جانە سانجى قالالارىنىڭ اراسىنداعى دوستىق بايلانىستاردى نىعايتۋ.
دەلەگاتسيانىڭ قۇرامىندا وبلىستىق جانە اۋداندىق اكىمدىكتەردىڭ وكىلدەرى، وبلىستىق باسقارمالاردىڭ باسشىلارى، ج و و رەكتورلارى، شارۋا قوجالىقتارىنىڭ باسشىلارى، كاسىپكەرلەر بار.
ساپار باعدارلاماسىندا جامبىلدىق دەلەگاتسيانىڭ سانجى قالاسىنىڭ باسشىلىعىمەن كەزدەسۋى، كاسىپورىندار، مادەنيەت مەكەمەلەرىنە بارۋ بار. قازاقستاندىق دەلەگاتسيا قىتايلىق اۋىلشارۋاشىلىق ايماقتىڭ قىزمەتىمەن، «يۋنحۋا» بيوتەحنولوگيالىق كومپانياسىنىڭ جۇمىسىمەن تانىسىپ، «لانشان- تۋنحە» حيميالىق كومپانياسىندا جانە «TBEA» ەلەكتر تەحنيكالىق كومپانياسىنىڭ باس باسقارماسىنا بارادى. بۇدان باسقا، «سيۋيچۋن» ءسۇت ونىمدەرىن شىعاراتىن جانە وڭدەيتىن كومپانيا، چانتسزيدەگى كاسىبي- تەحنيكالىق ينستيتۋت، سانجى ۇلتتىق جوعارى تەحنولوگيالىق ونەركاسىپ ايماعىمەن تانىسۋ جوسپارلانىپ وتىر.
ساپار قورىتىندىسىندا جامبىل وبلىسى مەن سانجى حۇيزۋ اۆتونوميالىق وبلىسىنىڭ اراسىندا باۋىرلاستىق بايلانىستاردى ورناتۋ تۋرالى كەلىسۋشىلىككە قول قويىلۋى مۇمكىن. ەكىجاقتى ىنتىماقتاستىقتى ودان ءارى دامىتۋ ءۇشىن ەكى مەملەكەتتىڭ ىسكەرلىك ورتالارىنىڭ قاتىسۋىمەن اۋىل شارۋاشىلىعى، ونەركاسىپ جانە مادەنيەت بويىنشا مەموراندۋمعا قول قويىلادى.
سونداي-اق قىتاي حالىق رەسپۋبليكاسىمەن ەكونوميكالىق ىنتىماقتاستىقتى دامىتۋ اياسىندا ەكىجاقتى ساۋدا- ەكونوميكالىق قاتىناستاردى نىعايتۋ ماسەلەلەرى بويىنشا پىكىر الماسۋ وتەدى.
