مىسىردىڭ الەكساندريا كىتاپحاناسىندا قازاق جەرىنەن شىققان، يسلام وركەنيەتىنە ۇلەس قوسقان عالىمدار تۋرالى ايتىلدى
ق ر س ءى م باسپا ءسوز قىزمەتىنىڭ حابارلاۋىنشا، ءىس- شاراعا مىسىر جانە باسقا ەلدەرگە تانىمال يسلام جانە ورتالىق ازيا ەلدەرىنىڭ تاريحىن زەرتتەۋشى عالىمدار، اكادەميالىق قايراتكەرلەر، سونداي- اق كاير قالاسىندا اككرەديتتەلگەن قازاقستان، وزبەكستان جانە تاجىكستاننىڭ ديپلوماتيالىق ميسسيالارىنىڭ باسشىلارى مەن وكىلدەرى قاتىستى.
قاتىسۋشىلار ماۋرەناھر ەلدەرىنەن شىققان اتاقتى ادامداردىڭ ءومىرى مەن عىلىمي شىعارماشىلىعىنا ارنالعان زەرتتەۋلەرى مەن باياندامالارىندا ورتاعاسىرلىق ورتا ازيا عالىمدارى ەڭبەكتەرىنىڭ يسلام وركەنيەتىن بايىتۋعا، اراب ءتىلى مەن ادەبيەتىن، فيلوسوفيا، تەولوگيا جانە جاراتىلىس تانۋ عىلىمدارىنىڭ دامۋىنا جانە بەيبىت سۇيگىش يسلام ءدىنىن تاراتا وتىرىپ، ادامزاتتىڭ ورتاق قۇندىلىقتاردىڭ ساقتالۋى مەن ارتۋىنا قوسقان ۇلەستەرىن جان- جاقتى اشىپ كورسەتتى.
ءوز بايانداماسىندا قازاقستاننىڭ مىسىرداعى ەلشىسى بەرىك ارىن قازىرگى قازاقستان جەرىنەن شىققان، يسلام وركەنيەتىنە باعا جەتپەس ۇلەس قوسقان ءابۋ ناسىر ءال-فارابي، ءابۋ يبراحيم ىسقاق ءال-فارابي، ءابۋ ناسىر ءال-جاۋھاري، حۋسام اد- دين سىعاناقي، احمەد ياساۋي جانە باسقا دا اتاقتى عالىمداردىڭ ءومىرى مەن شىعارماشىلىعى جايىنا توقتالدى. ول قاتىسۋشىلارعا وسى عالىمداردىڭ ەسىمدەرىن ماڭگى ەستە قالدىرۋ، ەڭبەكتەرىن زەرتتەپ، جارىققا شىعارۋ باعىتىندا قازاقستان ۇكىمەتى جاساپ جاتقان شارالار جايىنان تولىق ماعلۇمات بەردى.
وسى ورايدا قازاقستاندىق ديپلومات 2004 - 2011 -جىلدار ارالىعىنداعى كەزەڭدە قازاقستان پرەزيدەنتى نۋرسۋلتان نازاربايەۆتىڭ باستاماسىمەن ىسكە اسىرىلعان، الەم كىتاپحانالارىنان قازاق حالقىنىڭ تاريحى، ەتنوگرافياسى مەن ونەرى تۋرالى مىڭداعان قۇندى مۇراعاتتاردى تابۋعا مۇمكىندىك بەرگەن «مادەني مۇرا» مەملەكەتتىك باعدارلامانىڭ ناتيجەلەرى تۋرالى مالىمدەدى.
كونفەرەنسيا بارىسىندا ەلشى الەكساندريا كىتاپحاناسى مەن اسيۋت ۋنيۆەرسيتەتى كىتاپحاناسىنىڭ قورىنا قازاقستاننىڭ تاريحى مەن بۇگىنگى دامۋى تۋرالى اراب جانە اعىلشىن تىلدەرىندە جارىق كورگەن كىتاپتاردى، سولاردىڭ قاتارىندا ەلباسىنىڭ قازاقستاننىڭ تاۋەلسىز مەملەكەت رەتىندە قالىپتاسۋىنا ارنالعان ەڭبەكتەرىنىڭ جيناعىن، سونداي-اق قازاق اقىن- جازۋشىلارىنىڭ ادەبي شىعارمالارىن، اتاپ ايتقاندا، اباي قۇنانبايەۆتىڭ، ءىلياس ەسەنبەرليننىڭ، نەمات كەلىمبەتوۆتىڭ تۋىندىلارىن سىيعا بەردى.
