قىتاي تاراپى قازاقستاننان وسىمدىك مايىن ساتىپ الۋدا
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا وسىمدىك شارۋاشىلىعى ونىمدەرىن ءوندىرۋ مەن قايتا وڭدەۋ دەپارتامەنتىنىڭ ديرەكتورى اجار قادجىبەكوۆا ءمالىم ەتتى.
مايلى داقىلدار ەگىستەرىن ارتتىرۋ ناتيجەسىندە سالادا شەتەل ينۆەستورلارىنىڭ قىزىعۋشىلىعى ارتقانىنا توقتالعان ول، قازىرگى كەزدە قازاقستان اۋماعىندا مايلى داقىلداردى وڭدەۋ بويىنشا زاۋىتتاردىڭ قۇرىلىسى جوسپارلانىپ وتىرعانىن جەتكىزدى.
دەپارتامەنت باسشىسىنىڭ سوزىنە قاراعاندا، ناۋرىزدا ق ر ا ش م مەن ق ح ر- دىڭ «سينوما» اتتى ءىرى مەملەكەتتىك كورپوراتسياسى قىتايعا يمپورتتى العا جىلجىتۋ بويىنشا بىرلەسكەن ءىس- قيمىل جوسپارىن بەكىتتى.
«بيىل كورپوراتسيا قازاقستاندا مايلى داقىلداردىڭ شيكىزاتىن (كۇنباعىس، زىعىر، راپس) ساتىپ الىپ، قىتايعا يمپورتتاۋدى كوزدەۋدە. سونىمەن قاتار ولار بۇل داقىلداردان وسىمدىك مايىن دا ساتىپ الۋعا نيەتتى. ق ح ر- عا 2 مىڭ توننا وسىمدىك مايى ەكسپورتتالدى. بولاشاقتا جىل سايىن ءاربىر داقىلدان ساتىپ الۋ كولەمىن 200 مىڭ تونناعا دەيىن ارتتىرۋدى جوسپارلاپ وتىر»، - دەدى اجار قاجىبەكوۆا.
