كوپەن كۇلكىگە كومدى
كەزىندە قازاق ساتيراسىنىڭ سارابدال قازىسى اتانعان تەمىربەك قوجاكەيەۆ ءبىزدى وسىلاي وقىتاتىن. انشەيىندە قاراسى كورىنسە التى قىردى اينالىپ قاشاتىن ستۋدەنتتەر قاتال پروفەسسورىمىزدىڭ ساباعىندا ەكى ەزۋلەرىن جيا الماي قالاتىن. قىزىقتى لەكسيانىڭ «قىزۋىمەن» ءتىپتى، ونىڭ جۋرناليستيكا فاكۋلتەتىن اشسا - الاقانىندا، جۇمسا - جۇدىرىعىندا ۇستايتىن دوكەي دەكان ەكەنى ەسىمىزدەن شىعىپ كەتەتىن.
ال، ەندى وسى تەمكەڭنىڭ «تەپكىسىنە» شىداعان شاكىرتتەرىنىڭ تالايى كەيىن باسپا ءسوزدىڭ ءباھادۇرى اتانعانى بەلگىلى. ەلوردا ەندىگىندەگى ەڭ بەدەلدى وقۋ وردالارىنىڭ بىرىنەن سانالاتىن ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندەگى «كاۋسار» مادەني- تانىمدىق بىرلەستىگى ۇيىمداستىرعان «ءان مەن ءازىل» اتتى كوڭىلدى كەشتە كوپشىلىكتى كۇلكىگە كەنەلتكەن كوپەن امىربەكوۆ تە سولاردىڭ سويىنان.
اڭگىمە تىزگىنىن ادەتتەگىدەي ءوز قولىنا العان اتالمىش رۋحاني تاعىلىم وتاۋىنىڭ جەتەكشىسى، قازاقستاننىڭ ەڭبەك سىڭىرگەن ءارتىسى كەنجەعالي مىرجىقبايەۆ كەزدەسۋگە كەلگەن قادىرلى قوناقتىڭ قوجاناسىر باباسىنان ميراس قىلعان قالجىڭ قورجىنىن اقتارىپ، كورەرمەن قاۋىمعا كوتەرىڭكى كوڭىل- كۇي سىيلادى.
كورگەنى بار كوپەكەڭ كوزى قاراقتى وقىرمانعا جاقسى تانىس «مىڭ ءبىر مىسالىنان» ۇزىندىلەر وقىپ ۇزدىككەن جوق. ەسەسىنە ەسىمدەرى ەلگە تانىمال وسپانحان اۋباكىروۆ، شونا سماحان ۇلى، سادىقبەك ادامبەكوۆ، قالتاي مۇحامەدجانوۆ، ءشامشى قالداياقوۆ، قاجىتاي ءىلياسوۆ سەكىلدى الاشقا اتى كەتكەن الدىڭعى بۋىن اعالارى تۋرالى ءازىل- شىنى ارالاس ادەمى ەستەلىكتەر ايتتى. ولاردىڭ قوعام قوتىرىن قانىن شىعارا قاسىعان تىكەنەك ءتىلدى تۋىندىلارىنىڭ ءالى كۇنگە دەيىن ومىرشەڭدىگىن اتاپ ءوتتى. ۇزاق جىلدارعى ۇزىلىستەن كەيىن رەسپۋبليكالىق «ايقىن» گازەتىنىڭ قوسىمشاسى بولىپ جارىق كورىپ جاتقان «ارانىڭ» رەداكتورى رەتىندە قازىرگى تاڭدا قاتتى بەلەڭ العان جەمقورلىق، پاراقورلىق، سىبايلاستىق سياقتى كەساپاتتاردىڭ تامىرىنا بالتا شابىلماي مەملەكەتتىگىمىزدى نىعايتۋ ءىسى ىلگەرى باسپايتىنىن جەتكىزدى.
اسەرلى كەش داۋىسى كوكتە دامىلداعان كەنجەعالي مىرجىقبايەۆتىڭ ورىنداۋىنداعى ءماريام جاگور قىزىنىڭ «دۋدار- اي»، سىدىق مۇحامەدجانوۆتىڭ «ايتەۋىر سول قىز - ءبىر سۇلۋ»، ءشامشى قالداياقوۆتىڭ «ءانىم سەن ەدىڭ» جانە تاعى باسقا الەۋمەت ءسۇيىپ تىڭدايتىن تاماشا اندەرمەن ادىپتەلىپ وتىردى.
كەزدەسۋ سوڭىندا ساحناعا كوتەرىلگەن ۋنيۆەرسيتەت رەكتورى ەرلان سىدىقوۆ قابىرعالى قالامگەرگە جينالعان جۇرتشىلىق اتىنان ريزاشىلىعىن ءبىلدىرىپ، شىعارماشىلىق تابىس تىلەدى.
تالعات باتىرحان، «ەگەمەن قازاقستان».
سۋرەتتى تۇسىرگەن ەربول ەردەنبەك.
