الماتىدا ءدىن قىزمەتكەرلەرى ءدىني بىلىكتىلىك بويىنشا اتتەستاتسيادان ءوتىپ جاتىر - فوتو
يگى شارا بارىسىندا باس ءمۇفتي قازاقستان مۇسىلماندارى ءدىني باسقارماسىنىڭ يمامداردىڭ ءبىلىمىن ارتتىرۋعا اسا ءمان بەرىپ وتىرعاندىعىن ايتتى.
«يسلام ءدىنى - عىلىم- ءبىلىم ءدىنى. يسلام ءدىنى پايدا بولعالى مۇسىلمانداردى عىلىم- بىلىمگە شاقىرۋمەن كەلەدى. ءدىني باسقارما وسى باعىتتا ەلىمىزدە ءدىني ءبىلىم بەرۋدى دامىتۋدىڭ تۇجىرىمداماسىن قابىلداعانىن جاقسى بىلەسىزدەر. وندا قازاقستان مۇسىلماندارى ءدىني باسقارماسىنىڭ ءدىني ءبىلىم بەرۋ جۇيەسىن قالىپتاستىرۋ كوزدەلگەن. اتتەستاتسيالاۋ جۇمىسىنىڭ ماقساتى - ءدىن قىزمەتكەرلەرىنىڭ ءدىني ءبىلىم دەڭگەيىن انىقتاي وتىرىپ، ساۋاتىن جەتىلدىرۋگە جاعداي جاساۋ، مۇمكىندىكتەر تۋعىزۋ»، - دەدى باس ءمۇفتي ەرجان قاجى مالعاجى ۇلى.
ءدىن قىزمەتكەرلەرىن اتتەستاتسيالاۋ كەزەڭ- كەزەڭمەن وتەدى. ءبىرىنشى كەزەكتە الماتى قالاسىنىڭ اۋدان مەشىتتەرىنىڭ باس يمامدارى، ەكىنشى كەزەكتە قالا مەشىتتەرىنىڭ نايب يمامدارى، ازانشىلارى مەن ءىس باسقارۋشىلارى وتەدى.
قالا يمامدارى «قازاقستان مۇسىلماندارىنىڭ تۇعىرناماسى»، «شىنايى مۇسىلماننىڭ تۇلعالىق بەينەسى»، «يمامنىڭ تۇلعالىق كەلبەتى»، «قازاقستان مۇسىلماندارى ءدىني باسقارماسى قىزمەتكەرىنىڭ ەتيكاسى» توڭىرەگىندە سىناق تاپسىرادى. بيلەت بويىنشا كەلەتىن سۇراقتارعا ءدىن قىزمەتكەرلەرى اۋىزشا جانە جازباشا جاۋاپ بەرەدى. بۇل شارا ءدىن قىزمەتكەرلەرىنىڭ ءبىلىمى مەن بىلىكتىلىگىنە جان- جاقتى جانە ءادىل باعا بەرۋ، سونداي- اق يمامداردىڭ ءبىلىمىن ۇزدىكسىز جەتىلدىرۋ ماقساتىندا وتكىزىلىپ وتىر.
ايتا كەتەلىك، الماتى قالاسى بويىنشا بارلىعى 150 ءدىن قىزمەتكەرى سىناقتان وتەدى. ەمتيحان ەكى كۇنگە جالعاسادى. ساراپتاۋ كوميسسياسىنىڭ جۇمىسىنا شاريعات جانە ءپاتۋا ءبولىمى مەڭگەرۋشىسىنىڭ ورىنباسارى سانسىزباي شوقانوۆ، ق م د ب ءدىن ىستەرى ءبولىمىنىڭ باسشىسى كامالجان تۇردىبايەۆ جانە الماتى قالاسىنىڭ باس يمامى نۇربەك ەسماعانبەت قاتىسۋدا.
اۆتور: ايبوتا جاپپاربەرگەن
