الماتىدا ستۋدەنتتەر اراسىندا ءشامشى اندەرىنەن بايقاۋ وتكىزىلدى - فوتو

الماتى. قازاقپارات - قازاق مەملەكەتتىك قىزدار پەداگوگيكالىق ۋنيۆەرسيتەتىندە بەلگىلى سازگەر، قازاق ءۆالسىنىڭ كورولى ءشامشى قالداياقوۆقا ارنالعان «ءانىم سەن ەدىڭ» اتتى ءان بايقاۋى ءوتتى.

بايقاۋدى ونەر جانە مادەنيەت فاكۋلتەتى ۇيىمداستىرىپ، 8 ونەرپاز باق سىناستى.

«بۇل يگى شارانى ۇيىمداستىرۋىمىزدىڭ سەبەبى، بولاشاق شىعارماشىلىق، ونەر ادامدارى بولعان سوڭ، ستۋدەنت- جاستاردى سول سالانىڭ مايتالمانى بولۋعا ىنتالاندىرۋ. ونىڭ ۇستىنە ءشامشى اندەرى دەسە، ورە تۇرەگەلمەيتىن قازاق جوق. بايقاۋدىڭ ماقساتى - ءبىلىم الۋشىلاردىڭ پاتريوتتىق سەزىمىن وياتىپ، ءشامشى اندەرىن وسكەلەڭ ۇرپاققا جەتكىزە وتىرىپ، ەرەكشە تالانتتاردى تابۋ بولاتىن»، - دەدى مادەني-بۇقارالىق جۇمىستاردىڭ تەورياسى مەن ادىستەمەسى كافەدراسىنىڭ پروفەسسورى ا. كوپبايەۆ.

سونداي-اق، كەشكە ءادىلقازىلار القاسى رەتىندە ق ر ەڭبەك سىڭىرگەن تانىمال انشىلەرى گۇلنار سيقىمبايەۆا، گۇلميرا اقۇرپەكوۆا جانە ق ر مادەنيەت قايراتكەرى گۇلنۇر ومىربايەۆا ارنايى كەلىپ قاتىسىپ، ءوز باعالارىن بەرىپ، سىن-پىكىرلەرىن ايتتى.

سايىستىڭ شارتى بويىنشا ۇمىتكەرلەر ەكى تۋىندى ورىنداۋ قاجەت بولدى: ءبىرى ءشامشى ءانى بولسا، ەكىنشىسى ەركىن تاقىرىپتا ونەر كورسەتۋ. وعان قوسا، بايقاۋعا قاتىسۋشىلار بايان، فورتەپيانو، دومبىرا اسپاپتارىنىڭ سۇيەمەلدەۋىمەن ءاندى جاندى داۋىسپەن ورىنداپ شىقتى.

«مادەني- بۇقارالىق جۇمىستاردىڭ تەورياسى مەن ادىستەمەسى» كافەدراسىنىڭ 4 -كۋرس ستۋدەنتى ايدانا قۋانىش باس جۇلدەنى الدى، 1-ورىندى «مۋزىكالىق ءبىلىم بەرۋدىڭ تەورياسى مەن ادىستەمەسى» كافەدراسىنىڭ 4 -كۋرس ستۋدەنتى كۇنىمقىز شەراليەۆا يەلەندى. ەكىنشى ورىندى 2 -كۋرس ستۋدەنتى دانا ءتاجىحانوۆا السا، ءۇشىنشى ورىنعا 1 -كۋرس ستۋدەنتى قارلىعاش ءناسىروۆا لايىق دەپ تابىلدى. ال، قالعاندارى ىنتالاندىرۋ سىيلىقتارىمەن ماراپاتتالدى.