استانادا شەبەر فرانسۋز پيانينوشىسى سەليمەن دودە كونسەرت وتكىزەدى

استانا. قازاقپارات - شەبەر فرانسۋز پيانينوشىسى سەليمەن دودە «استانا وپەرا» تەاترىنىڭ كامەرالىق زالىندا «فرانسيادان سۇيىسپەنشىلىكپەن» اتتى كونسەرت قويادى.

شارا قازاقستانداعى فرانتسيا ەلشىلىگىنىڭ قولداۋىمەن وتەدى، دەپ حابارلايدى تەاتردىڭ باسپا ءسوز قىزمەتى.

باعدارلامانىڭ ءبىرىنشى ءبولىمىن ف. ليست پەن ف. شوپەننىڭ شىعارمالارى كوركەمدەسە، ەكىنشى بولىمدە گ. فورە مەن س. فرانكتىڭ تانىمال شىعارمالارى ورىندالادى. فرانسۋز مۋزىكا سىنشىلارى فورەنىڭ بەكزاتتىق سازدى ءستيلىن، مۋزىكاسىنىڭ مانەرلىگى مەن تازالىعىن جوعارى باعالايدى.

«شەتەل مۋزىكانتتارىنىڭ ونەر كورسەتۋى، تانىمال كلاسسيكا شىعارمالارىن جاڭاشا ورىنداۋ ءستيلىن ۇسىنادى. فرانسيا پيانينوشىسى سەليمەن دودەنىڭ قالاي وينايتىنىن، ونىڭ ورىنداۋىنداعى ف. شوپەن، ف. ليست، سونىمەن قاتار ونىڭ وتانداستارى - سەزار فرانك پەن گابريەل فورەنىڭ شىعارمالارىن تىڭداعان وتە قىزىق. پيانينوشى باعدارلاماسىندا گ. فورەنىڭ سي- مينورلى نوكتيۋرنىن ۇسىنادى. بۇل تاماشا كومپوزيتوردىڭ مۋزىكاسى بۇگىن دە ءوزىنىڭ تارتىمدىلىعىن جوعالتپاعان. استانالىق مۋزىكا سۇيەر قاۋىم سەليمەن دودەنىڭ ورىنداۋىنداعى وتانداستارىنىڭ مۋزىكاسىن راقاتتانا تىڭدايتىنىنا سەنىمدىمىن»، - دەيدى مۋزىكاتانۋشى، ءارى كەش جۇرگىزۋشىسى مارجان جاكەنوۆا.

سەليمەن دودە - جان فرانسە اتىنداعى بايقاۋدىڭ، ۆال- د'يزەردەگى حالىقارالىق كونكۋرستىڭ، Pro Musicis حالىقارالىق سىيلىعىنىڭ لاۋرەاتى.

Arion ستۋدياسىندا باحتىڭ «فۋگانىڭ ونەرى» ديسكىلەرىن جازدى (2013). سكريپكاشى اماندا فاۆەمەن بىرگە جاساعان «مايدانگەردىڭ جول دورباسىندا» جوباسى (2013)، ءبىرىنشى دۇنيەجۇزىلىك سوعىس ءجۇزجىلدىعىنىڭ ميسسياسى تاعايىنداعان «ءجۇزجىلدىق» بەلگىسىن يەلەندى.

پيانينوشى حورەوگرافتار - يۋۆال پيك پەن يوانن بۋرجۋا، اكتريسا ماري- كريستين باررومەن بىرىگىپ، وزىندىك ەرەكشە شىعارمالار جوباسىن جاساۋمەن اينالىسۋدا. ول درومداعى ليۋسەن ديۋروزۋار اتىنداعى كامەرالىق مۋزىكا فەستيۆالىنىڭ كوركەمدىك ديرەكتورى قىزمەتىن اتقارادى.