اينۇر تۇرسىنبايەۆا: جار تاڭداۋدا جولىم بولعان اداممىن
جاقىن كۇندەردىڭ بىرىندە جەر بەتىندەگى ەڭ ءبىرىنشى تۇرعىزىلعان ۇيگە بارىپ، اللا الدىنداعى پارىزىن وتەپ قايتقان ايتىسكەر اقىن اينۇر تۇرسىنبايەۆا «ايتىس بار، وتباسى، بالا-شاعام، كۇتپەسكە بولمايتىن قوناق... ت. س. س. ەندى وسىدان-اق وتباسى مەن ونەردىڭ تىزگىنىن قاتار الىپ ءجۇرۋدىڭ قانشالىقتى قيىن ەكەنىن بايقاۋعا بولادى دەپ ويلايمىن.
ايەلدىڭ قىرىق جانى بار عوي، شىدامدى حالىق. ونەردىڭ جۇگىن ارقالاپ، تاۋەكەل ەتكەننەن كەيىن بوساڭسۋعا حاقىمىز جوق» دەپ قانشا تىرىسىپ باقسا دا، كوپ ىسكە ۋاقىتى جەتە بەرمەيتىنىن ايتتى.
جولداسىن جاسىراتىن تۇرسىنبايەۆا وقىرماندارىنىڭ قازىرگى وتباسى تۋرالى قويىلعان سۇراعىنان ادەتتەگىدەي اينالىپ وتپەدى.
- ءسىزدىڭ قازىرگى جولداسىڭىز شامسات يسابەكوۆ ادامگەرشىلىگى جوعارى ادام ەكەنىنەن حاباردارمىز. ول كىسى ەلىمىزدەگى ساياسي مانسابىنان بولەك، تاەۆكوندو فەدەراتسياسىنىڭ پرەزيدەنتى ەكەنىن بىلەمىز. ءسىز جولداسىڭىزبەن بىرگە تاەكۆوندودان وتەتىن جارىستارعا بارىپ تۇراسىز با؟ جالپى سپورتقا كوزقاراسىڭىز قانداي؟
- جالپى جولداسىم وتباسىمىزدىڭ كوپشىلىك تالقىسىنا تۇسكەنىنە وتە قارسى ادام بولعاندىقتان قىسقا جاۋاپ بەرەيىن. جار تاڭداۋدا جولىم بولعان اداممىن. ونەردە دە، ومىردە دە تياناقتى، ماتەريالدىق تۇردە كومەكتەسەتىن، مەنىڭ عانا ەمەس وتباسىمىزدىڭ تىرەگىنە اللاھ قۋات بەرسە ەكەن دەپ اماندىعىن تىلەپ قانا وتىرامىن. اللاھ بارشا قىز-كەلىنشەكتەرگە ايەل باقىتىن ءناسىپ ەتسىن! سپورتقا وتە قۇشتارمىن. مۇمكىندىك بولسا ءاربىر ادام شاماسىنىڭ كەلگەنىنشە اينالىسۋ كەرەك! سەبەبى، سپورت - دەنساۋلىقتىڭ كەپىلى!
بۇدان وزگە «جاس اقىندارعا كوڭىلىم تولعاندا قانداي. جاستاردىڭ ايتىسىن ايىزىم قانىپ ءسۇيسىنىپ تىڭدايمىن. ءبىز دە جاس بولدىق، جاسقانشاق بولدىق. قازىرگى جاستاردا ورلىك باسىم. ءور مىنەزدى اقىن عانا ەلدىڭ ءسوزىن ايتا الادى. الدىمەن باپ شابادى، بەينەت ءتۇبى زەينەت دەمەكشى ايتىستىڭ جەڭىسى - ەڭبەگىڭنىڭ جەمىسى!» دەپ جاستارعا باعا بەرۋدە ءادىل تورەشى بولعىسى كەلەتىنىن ايتتى.
مۇنىمەن قاتار، «سىنعا ءارقالاي قارايمىن. كوپتى كورگەن، تاجىريبەلى اعا، اپالارىم ايتسا، جانى اشيتىن دوستارىم جىلاتىپ ايتسا مىندەتتى تۇردە قورىتىندى شىعارامىن. ال، اتى-ءجونى بەلگىسىز بىرەۋلەر جاسىرىن تۇردە سىن ايتقان بولىپ كەكەتىپ، مۇقاتىپ وتىرسا ايايمىن. احيرەت كۇنىندە سول جاسىرىن «جاناشىرلاردىڭ» ءبارى جانىمدى جارالاعان اۋىر سوزدەرى ءۇشىن جاۋاپ بەرەدى ەكەن، وسى ءپاتۋانى ەستىگەلى ولاردى اياپ ءجۇرمىن قاتتى.
ال مىنا دۇنيەدە ءبارىن باقىلاپ وتىرعان اسا ۇلى اللاھ تاعالام ءىشى تار بەيشارالاردىڭ ءىسىن العا جۇرگىزبەي سورلاتىپ قويادى ەكەن. سوندىقتان، وزدەرىنە سولاي جۇرگەن ۇناسا جازا بەرسىن، جامانداي بەرسىن. عايبات ارقىلى ماعان كومەكتەسىپ جاتقاندارىن بىلسە عوي دەپ ارمانداپ قويامىن كەيدە.
ۇستانىم ءار نارسەگە ءارتۇرلى بولادى عوي. مىسالى، وتباسى تۋرالى ۇستانىم، دوس، تۋىس جونىندە ۇستانىم دەگەندەي. سۇراعىڭ كەلگەنى ايتىسكەر اقىن جايىندا بولسا، مەنىڭ ۇستانىمىم: «ءبىر اقىننىڭ ساۋ بولسا ءتىل مەن جاعى، مىڭ ادامنىڭ ايتىلار مۇڭ مەن زارى»، - دەپ ءوزىنىڭ دە الدا حالىقتىڭ تالاي مۇڭىن جەتكىزە الاتىندىعىن تىلگە تيەك ەتتى.
تۇرسىنبايەۆانىڭ ايتۋىنشا، جاستارعا ەمەس، وزىنە كوبىرەك كوڭىلى تولمايدى ەكەن. ءار كەمشىلىگىنەن ساباق الىپ، قاتەلىگىن ەكىنشى رەت قايتالاماۋعا تىرىساتىن كورىنەدى.
«مەن باقىتتى اقىنمىن، اسەلحان، ءاسيا اپالارىممەن ءبىر ساحنادا ءجۇردىم، اقمارال، مارجانداردان ساباق الدىم، وزىمنەن كەيىنگى سارالاردىڭ ءوزى قازىر تاجىريبەلى اقىنعا اينالدى، ياعني بىرنەشە بۋىنمەن ءبىر ءجۇرۋ باقىتى بۇيىردى ماعان. قاتتى شارشاعان، توقىراعان كەزدەرىم دە بولدى. باس تارتتىم قانشا ايتىستان، ءبىراق ءبارىبىر قاتىسۋعا تۋرا كەلدى.
سەبەبى، وزىمە سۇرانىس بار ەكەنىنە كوزىم جەتتى. اينۇر، سەن ەندى دەمال، ورنىڭا وسىنداي قىزدار كەپ جاتىر دەسە قۋانا-قۋانا كەتە سالاتىن كۇيدە ءجۇرمىن قازىر. شاكىرت تاربيەلەۋ قازىرگى مەنىڭ ەڭ باستى شارۋام بولىپ ءجۇر. بارعان جەرىمنىڭ بارىندە ولەڭ وقىعان، دومبىرا تارتقان قىز كورسەم سۇراقتىڭ استىنا الام، سارا مەن ۇلبيكەلەردى تۋعان قازاق اقىن قىزعا كەندە بولماۋ كەرەك قوي، بۇيىرسا كوپ كۇتتىرمەيمىن»، - دەپ ءوزىنىڭ ايتىستان قالماي كەلە جاتقانىن قىزداردىڭ ازدىعىمەن بايلانىستىردى.
