ن. بايعانين مەن ءا. مولداعۇلوۆانىڭ جەكە زاتتارى ۇلتتىق مۋزەيگە تاپسىرىلدى - فوتو

استانا. قازاقپارات - بۇگىن اقتوبە قالاسى ع. جۇبانوۆا اتىنداعى وبلىستىق فيلارمونياسىندا «ۇلتتىق مۋزەيگە سىي تارتۋ» رەسپۋبليكالىق اكسياسى ءوتتى.

ۇلتتىق مۋزەيدىڭ اقپاراتتىق- يميدجدىك قىزمەتىنىڭ حابارلاۋىنشا، ءىس- شارادا ءسوز العان اقتوبە وبلىسى اكىمىنىڭ ورىنباسارى اسقار شەريازدانوۆ اكتسياعا اتسالىسقان بارلىق قاتىسۋشىلارعا العىس ءبىلدىردى.

 «بيىل قازاقستان رەسپۋبليكاسىنىڭ تاۋەلسىزدىگىنە 25 جىل تولىپ وتىر. سوندىقتان دا «ۇلتتىق مۋزەيگە سىي تارتۋ» اكسياسى ۇلتتىق يدەالوگيانى، ونىڭ ىشىندە «ماڭگىلىك ەل» يدەياسىن قولداۋ ماقساتىندا ۇيىمداستىرىلىپ وتىرعان ەرەكشە شارا. ەلىمىزدىڭ تۇكپىر- تۇكپىرىنەن جينالىپ جاتقان جادىگەرلەر قازاق تاريحىنىڭ كۋاگەرى ىسپەتتى. ونىڭ بارلىعى دا كەلەشەك ۇرپاق ءۇشىن اسا قاجەت. اقتوبە وبلىسى اكىمى اتىنان وسى ءىس- شاراعا بەلسەندى تۇردە قاتىسىپ جاتقان بارلىق ازاماتتارعا العىس بىلدىرەمىن»، - دەدى ا. شەريازدانوۆ.

ق ر ۇلتتىق مۋزەيى قورلاردى جيناقتاۋ، ەسەپكە الۋ جانە ساقتاۋ قىزمەتىنىڭ باسشىسى رىسكۇل ەسكەندىر قىزى «ۇلتتىق مۋزەيگە سىي تارتۋ» اكسياسى تۋرالى ايتا كەلە، بارلىق قاتىسۋشىلارعا مۋزەي ديرەكتورى دارحان مىڭبايدىڭ اتىنان العىس حاتتار تابىستادى.

 «وسىدان ءبىر جىل بۇرىن بۇل اكسيا استانا قالاسىنان باستاۋ العان ەدى. ودان كەيىن اتالمىش شارا الماتى جانە  قىزىلوردا قالالارىندا ءوتىپ، ۇلتتىق مۋزەي قورىنا مىڭنان استام جادىگەر تاپسىرىلدى. ەندىگى كەزەك، مىنە، اقتوبە وڭىرىنە كەلىپ جەتتى. ناتيجەسىندە 300-گە جۋىق جادىگەر جينالدى. ۇلتتىڭ رۋحى، بولمىس- ءبىتىمى، اتا تانىمى كوپ نارسەدەن بيىك تۇرادى جانە ونىڭ قۇنى التىنمەن دە، باسقامەن دە ولشەنبەيدى. وسى يدەولوگيانى بويىنا ءسىڭىرىپ وسكەن بالالاردان ەرتەڭ نامىستى قولدان بەرمەيتىن ۇلكەن ازاماتتار شىعادى». - دەدى ر. ەسكەندىر قىزى.

 قۇدايبەرگەن جۇبانوۆ، نۇرپەيىس بايعانين، ءاليا مولداعۇلوۆا، مارات وسپانوۆ، قادىرالى ەرجانوۆ سىندى ۇلتىمىزدىڭ ءبىرتۋار پەرزەنتتەرىنىڭ ۇرپاقتارى قۇندى جادىگەرلەردى تابىستاسا، مەملەكەت جانە قوعام قايراتكەرى امانگەلدى ايتالى، ق ر ءبىلىم بەرۋ ءىسىنىڭ ۇزدىگى عالىمجان بايداربەس، اقتوبەلىك جاس ميلليونەر مارات جاقسىلىق ۇلى، مادەنيەت قايراتكەرى قايىرعالي قوجامبايەۆ، بوكستان ازيا جانە الەم چەمپيونى گاليب دجافاروۆ، قازاقشا كۇرەستەن ازيا جانە الەم چەمپيونى باقتىباي قيسىقوۆ، سامبو جانە دزيۋدو كۇرەسىنەن ازيا جانە 2 مارتە الەم چەمپيونى رايسا بايليەۆا، گىر كوتەرۋدەن 12 مارتە الەم چەمپيونى ەۆگەني گونچاروۆ سەكىلدى وبلىس ماقتانىشتارى ۇلتتىق مۋزەي قورىنا جەكە زاتتارىن تاپسىردى.

 جادىگەر كەنباي، ورىنعالي حايرۋللين، ەۆگەنيا سۋحوتينا، مارات عابدراحمانوۆ، نۇرلان جاقىبايەۆ، ماقسۇت جاحانوۆ، الەكساندر كورۆات، بولات اتىراۋبايەۆ، ەرقوساي ءابىلوۆ، قايرات نوعايەۆ، گۇلدەن ايازبايەۆا، الەكسەي ۆەرەشاگين، تايماس تەلەۋىشوۆ سەكىلدى تالانتتى سۋرەتشى- مۇسىنشىلەر مۋزەيگە شىعارماشىلىق تۋىندىلارىن تارتۋ ەتتى.

 سونىمەن قاتار، اتالمىش اكسياعا جەرگىلىكتى كاسىپكەرلەر دە بەلسەندى تۇردە قاتىستى. اتاپ ايتساق، «دينار- ەلەكتروماش» ج ش س ۇلتتىق مۋزەيگە XVIII عاسىردىڭ ەكىنشى جارتىسىنا جاتاتىن كەلى مەن كەلساپتى تاپسىردى.

شارا سوڭىندا «ارايلى اقتوبە» فولكلورلىق انسامبلى اننەن شاشۋ شاشىپ، مىڭ بۇرالعان بيشىلەر كورەرمەننىڭ قوشەمەتىنە بولەندى.

 ايتا كەتەيىك، «ۇلتتىق مۋزەيگە سىي تارتۋ» اكسياسى 2015 -جىلى 18 - ناۋرىزدا قازاقستان رەسپۋبليكاسى ۇلتتىق مۋزەيىندە سالتاناتتى تۇردە باستاۋ العان بولاتىن. اكسياعا قاتىسۋشى ءوزىنىڭ كوللەكسياسىنداعى قۇندى جادىگەردى، ەل تاريحىنا قاتىستى ەلەۋلى مۇرانى نەمەسە ەلگە بەلگىلى تۇلعانىڭ قولدانعان زاتتارىن مۋزەيگە ساقتاۋعا تابىستايدى. بارلىق سىي- تارتۋلارعا زاڭدىق نەگىزدە قابىلداپ الۋ شارتى جاسالىپ، ولار ۇلتتىق مۋزەيدىڭ قورىنا وتكىزىلەدى. سىي- تارتۋلار نەگىزىندە ارنايى كورمە ۇيىمداستىرىلادى.