ءماجىلىس ۇكىمەتپەن بىرلەسىپ ساپالى زاڭدار قابىلداۋى كەرەك - ءماجىلىس سپيكەرى
«بۇگىن ءماجىلىستىڭ التىنشى شاقىرىلىمى زاڭ شىعارۋ جۇمىسىنا كىرىستى. ءبىرىنشى كەزەكتە ءبىز ءماجىلىستىڭ وكىلەتتىكتەرىن ىسكە اسىرۋدىڭ ءبىرىنشى سەسسياعا ارنالعان نەگىزگى شارالار جوسپارىن قابىلدادىق.
ەلباسىمىز اتاپ وتكەنىندەي، ەلىمىزدى تۇبەگەيلى جاڭعىرتاتىن اۋقىمدى ىستەردى، جۇزەگە اسىرىلىپ جاتقان ۇلت جوسپارىن ودان ءارى زاڭنامالىق قامتاماسىز ەتۋ بىزدەرگە جۇكتەلدى. ءبىرىڭعاي سالىقتىق جانە كەدەندىك كودەكستى، جەر قويناۋى مەن جەر قويناۋىن پايدالانۋ كودەكسىن قابىلداپ، باسەكەلەستىك، ەلەكترو ەنەرگەتيكا جانە مەملەكەتتىك فۋنكتسيالاردى باسەكەلەس ورتاعا بەرۋ سالاسىنداعى زاڭنامانى جەتىلدىرۋىمىز قاجەت»، - دەپ اتاپ ءوتتى ءماجىلىس سپيكەرى.
سونىمەن قاتار، ءتوراعا ءوزىن- ءوزى باسقارۋ ورگاندارىنىڭ بيۋدجەتتەرى مەن مەنشىگىن ءتيىمدى باسقارۋىن زاڭنامالىق قامتۋ ماسەلەسىنە توقتالا كەلە، بۇل زاڭ جوباسى كۇزدە ءماجىلىستىڭ قاراۋىنا تۇسەتىنىن اتاپ ءوتتى. ونىڭ ايتۋىنشا، ءماجىلىس دەپۋتاتتارى ۇكىمەتتى كۇتپەستەن وسى زاڭ جوباسىمەن جۇمىستى باستاپ كەتكەن. سونىمەن قاتار، پالاتانىڭ قورجىنىندا قازىرگى تاڭدا جيىرماعا تارتا زاڭ جوباسى بار.
«سوندىقتان دا، بارلىق ۇيىمداستىرۋشىلىق ماسەلەلەردى شۇعىل تۇردە شەشىپ، ناقتى زاڭ شىعارۋ پروتسەسىنە بەلسەنە ارالاسۋلارىڭىزدى سۇرايمىن. بارلىق پارلامەنتتىك فراكسيالار مەن دەپۋتاتتىق توپتار ۇكىمەت جانە قوعاممەن بىرلەسىپ، جەدەل، كاسىبي جانە اشىق جۇمىس ىستەپ، ساپالى زاڭدار قابىلداۋىمىز كەرەك»، - دەدى ب. ىزمۇحامبەتوۆ.
جالپى وتىرىسقا پالاتانىڭ 107 دەپۋتاتىنىڭ 105- ءى قاتىسۋدا.
ءماجىلىس بيۋروسىنىڭ ۇسىنىسى بويىنشا كۇن تارتىبىنە ءتورت ماسەلە ەنگىزىلگەن بولاتىن. اتاپ ايتقاندا، حالىقارالىق قايتا قۇرۋ جانە دامۋ بانكىمەن قازاقستاندا وفيستەر قۇرۋ جانە ولاردىڭ جۇمىس ىستەۋى تۋرالى، سونىمەن قاتار، ماكەدونيامەن ينۆەستيتسيالاردى كوتەرمەلەۋ جانە ءوزارا قورعاۋ تۋرالى ۇكىمەت ارالىق كەلىسىمدەردى راتيفيكاتسيالاۋ تۋرالى زاڭ جوبالارى ۇسىنىلادى. سونىمەن قاتار، ازاماتتىق زاڭنامانى جەتىلدىرۋ ماسەلەلەرى بويىنشا زاڭ جوباسىمەن جۇمىستى ودان ءارى جالعاستىرۋ ماسەلەسىن قارايتىن بولادى.
بۇدان بولەك، دەپۋتاتتار التىنشى سايلانعان ءماجىلىستىڭ وكىلەتتىكتەرىن ىسكە اسىرۋدىڭ ءبىرىنشى سەسسياعا ارنالعان نەگىزگى ءىس- شارالار جوسپارى تالقىلايدى.
اۆتور: قانات مامەتقازى ۇلى
