الماتىدا داۋلەت تۇرلىحانوۆتىڭ جۇلدەسى ءۇشىن گرەك-ريم كۇرەسىنەن رەسپۋبليكالىق تۋرنير باستالدى - فوتو
جارىستىڭ اشىلۋ سالتاناتىندا ەڭ الدىمەن ءسوز العان داۋلەت بولات ۇلىنىڭ اناسى ءمارزيا اپا جينالعان قاۋىمعا بۇگىنگى جارىستى تاماشالاۋعا كەلگەندىكتەرى ءۇشىن ريزاشىلىعىن ءبىلدىرىپ، جاس بالۋاندارعا ساتتىلىك تىلەدى.
«ءبىزدىڭ وتباسى ءۇشىن بوز كىلەمنىڭ ورنى ەرەكشە. داۋلەتىم 6- سىنىپتان باستاپ كۇرەسپەن مىقتاپ اينالىسا باستادى. تالاي شىڭداردى باعىندىردى. قازاقستاننىڭ الەمگە تانىلۋىنا داۋلەتىمنىڭ دە ەڭبەگى بار. بۇل ءۇشىن ارينە ونىڭ جاتتىقتىرۋشىلارىنا ايتار العىسىم شەكسىز. جاس بالۋان بالالارىما ساتتىلىك تىلەيمىن. داۋلەتىمنىڭ جولىن بەرسىن!»، - دەدى ءمارزيا تۇرلىحانوۆا.
ءوز كەزەگىندە گرەك- ريم كۇرەسىنەن ماسكەۋ وليمپياداسىنىڭ چەمپيونى جاقسىلىق ۇشكەمپىروۆ وسىنداي تۋرنيرلەردى ۇيىمداستىرۋدىڭ ماڭىزدىلىعىنا توقتالدى.
«ءبىز دارىندى، جاس بالۋانداردى دايىنداۋىمىز كەرەك. ولار جايدان-جاي پايدا بولا سالمايدى. بۇل ءۇشىن وسىنداي تۋرنيرلەر وتە قاجەت. بولاشاق وليمپيادا چەمپيوندارى وسىنداي جارىستاردا شىڭدالادى. سوندىقتان جاس بالۋاندارعا جانە الداعى ريو وليمپياداسىنا باراتىن بالۋاندارعا ساتتىلىك تىلەيمىن. التىننان القا تاعاتىندارىنا ءۇمىت ارتامىن»، - دەدى ج. ۇشكەمپىروۆ.
ال تۋرنير يەسى، داڭقتى بالۋان داۋلەت تۇرلىحانوۆ بۇگىنگى جارىس جاس بالۋانداردىڭ تويى ەكەندىگىن جەتكىزدى.
«ءبىز وسىنداي جارىستاردا شىڭدالدىق. جەڭىسكە دەگەن قۇشتارلىعىمىز ارتىپ، ازامات بولىپ وستىك. ەلىمىزدە ءالى تالاي چەمپيوندار شىعادى دەپ سەنەمىن. گرەك- ريم كۇرەسى - كۇرەستىڭ ىشىندەگى ەڭ ادەمىسى. كەزىندە قاجىمۇقان بابامىز دا كلاسسيكالىق فرانسۋز كۇرەسىمەن اينالىسىپ، اتى الەمگە تانىلدى. ەلىمىزدە ءبىرىنشى وليمپيادا چەمپيونى اناتوليي كولەسوۆ، ەكى دۇركىن وليمپيادا چەمپيونى ۆالەري ريازانسيەۆ، وليمپيادا چەمپيوندارى جاقسىلىق ۇشكەمپىروۆ، يۋري مەلنيچەنكو بارلىعى دا گرەك ريم كۇرەسىنىڭ بالۋاندارى. سوندىقتان، وليمپيادانىڭ جەڭىس تۇعىرىنا ءالى تالاي داڭقتى بالۋاندىرىمىز شىعاتىنا سەنەمىن»، - دەدى د. تۇرلىحانوۆ.
بۇگىنگى جارىسقا بارلىق 14 وبلىس پەن استانا، الماتى، تۇركىستان، جاركەنت، پاۆلودار قالالارىنان قۇرامىندا 240 بالۋان بار 24 كوماندا قاتىسۋدا. ءار كوماندادا 10 بالۋاننان بار. ەكى كۇنگە سوزىلاتىن جارىستا ولار 42 كەلى، 46 كەلى، 50 كەلى، 54 كەلى، 55 كەلى، 63 كەلى، 69 كەلى، 76 كەلى، 85 كەلى جانە 100 كەلى سالماق دارەجەلەرىندە ونەر كورسەتەتىن بولادى.
جەڭىمپازدار ديپلومادر، گراموتالار جانە باعالى سىيلىقتارمەن ماراپاتتالادى.
اۆتور: ايبوتا جاپپاربەرگەن
