كاسىپكەرلەر قۇقىعىن قورعاۋدىڭ ماڭىزى زور - ب. پالىمبەتوۆ

ورال. قازاقپارات - بۇگىن باتىس قازاقستاننىڭ وبلىس اكىمى التاي كولگىنوۆ قازاقستانداعى كاسىپكەرلەردىڭ قۇقىعىن قورعاۋ بويىنشا وكىلەتتى ۋاكىل بولات پالىمبەتوۆتى قابىلداپ، پىكىرلەستى.

كەزدەسۋدە ءوڭىر باسشىسىنىڭ اتاپ وتكەنىندەي، ەلباسى تاپسىرماسىنا سايكەس كاسىپكەرلىك احۋالدى جاقسارتىپ، شاعىن جانە ورتا بيزنەستى قولداۋ، اكىمشىلىك كەدەرگىلەردى جويۋ باعىتىندا ۇلكەن مىندەتتەر تۇر. وسى ورايدا جەرگىلىكتى اتقارۋشى ورگانداردىڭ دا كاسىپكەرلەرمەن بىرلەسە قىزمەت اتقارعانى ماڭىزدى. كاسىپكەرلەرگە جاعداي تۋعىزىپ، ينۆەستورلاردى تارتۋ كۇن تارتىبىنەن تۇسپەيدى. بۇل باعىتتا ۇلتتىق كاسىپكەرلەر پالاتاسىنىڭ قولداۋىمەن وڭىرلىك كاسىپكەرلەر پالاتاسىمەن بىرگە ناقتى جۇمىستار اتقارىلۋدا. «بيزنەستىڭ جول كارتاسى - 2020» باعدارلاماسىنا سايكەس كاسىپكەرلەرگە مەملەكەت تاراپىنان قولداۋ كورسەتىلىپ كەلە جاتقانى بەلگىلى. اۋىل كاسىپكەرلەرىنە دە شاعىن نەسيەلەر بولىنۋدە. بۇل باعىتتاعى جۇمىستار الداعى ۋاقىتتا دا جالعاسادى.

- ەلىمىزدە كاسىپكەرلەر قۇقىعىن قورعاۋعا ايرىقشا ءمان بەرىلەدى. ءبىزدىڭ ينستيتۋت تا وسى ماقساتتا قۇرىلدى. ەڭ باستىسى، شاعىن جانە ورتا بيزنەستىڭ دامۋىنا سەپتەسىپ، كاسىپكەرلەردى قورعاي ءبىلۋىمىز كەرەك. بۇل رەتتە وڭىردەگى كاسىپكەرلەرمەن كەزدەسىپ، پىكىر الىسۋدىڭ، وزەكتى ماسەلەلەردى جەرگىلىكتى جەرلەردە شەشۋدىڭ ماڭىزى زور، - دەدى ب. پالىمبەتوۆ.