اتىشۋلى قايرات جاماليەۆتىڭ قىمبات كولىگىن ەشكىم الماي جاتىر
3 جىلدان ارتىق قولدانىلماعان، سۋداي جاڭا لامبورگيني گاللاردونىڭ باستاپقى باعاسى 238 ميلليون تەڭگە بولعان.
بۇل تۋرالى 31- ارنا حابارلايدى.
ال اۋكتسيونداعى سپورتكاردىڭ مينيمالدى قۇنى 38 ميلليون 64 مىڭ تەڭگەدەن تومەن تۇسپەۋى كەرەك بولاتىن. الايدا قوعام اراسىندا ۇلكەن رەزونانس تۋدىرعان اتى شۋلى ءىس بويىنشا تاركىلەنگەن مۇلىكتى الامىن دەيتىن ادام تابىلماپتى.
تەمىر تۇلپاردى ارەستەن شىعارۋ، ەسەپكە قويۋ، سالىق پەن ايىپپۇل قارىزدارىن وتەۋ كولىكتىڭ جاڭا قوجايىنىنا جۇكتەلمەك. سونداي-اق كىلتى جوق لامبورگينيدى ساقتاۋ ورنىنان امالىن تاۋىپ، الىپ شىعۋ دا ساتىپ الۋشىنىڭ باس اۋرۋى.
اۋكتسيونعا قاتىسۋشىلاردى وسى ءبىر قيىندىقتار قورقىتتى ما، الدە قالتالى ازاماتتار اتى جامان بۇل وقيعادان الشاق بولعىلارى كەلدى مە، ايتەۋىر لامبورگينيگە سۇرانىس مۇلدە بولماعان ەكەن.
ال مەملەكەتتىك مۇلىك جانە جەكەشەلەندىرۋ دەپارتامەنتىنىڭ قىزمەتكەرلەرى ەليتالىق تەمىر تۇلپار جاڭا يەسىن تاپقانعا دەيىن ساۋداعا شىعارىلاتىنىن جەتكىزدى.
