ارمياندار ەريەۆانداعى قازاق جانە بەلارۋستىك ەلشىلەردى قۋىپ جىبەرۋدى ۇسىندى

استانا. قازاقپارات - ارمەنيا تۇرعىندارى ەلدەگى قازاقستان مەن بەلارۋس ەلشىلەرىن قۋىپ جىبەرۋ كەرەك دەگەن پىكىردى ۇستانىپ وتىر.

 جەرگىلىكتى حالىق الەۋمەتتىك جەلىلەردە وسىنداي باستاما كوتەرىپ، ونى قولداۋشىلار سانى ءبىر كۇندە كۇرت ءوسىپ كەتتى دەپ جازادى ArmenianReport.com پورتالىنا سىلتەمە جاساپ Skifnews.kz.

ارمياندار ۇ ق ك ۇ (ۇجىمدىق قاۋىپسىزدىك كەلىسىمى ۇيىمى) جانە ە ا ە و اياسىندا سەرىكتەس بولىپ جۇرگەن ەلدەر سىن ساعاتىندا تەرىس اينالدى دەپ رەنجىپ وتىر.

«الەۋمەتتىك جەلىلەردەگى قازاقستاندىق سەگمەنتتى قاراپ كورىڭىز - بارلىعى دا ءازىربايجاندى قولداپ وتىر. ءتىپتى، ءازىربايجاننىڭ اگرەسسياسى تۋرالى جازىپ جاتقان قازاقستاندىق ب ا ق- تاردىڭ ءوزى ۇ ق ك ۇ اياسىنداعى سەرىكتەس ەلگە شابۋىلدىڭ جاسالىپ جاتقانىن ايتپادى. قازىر ەريەۆان قازاقستان مەن بەلارۋس ەلىنىڭ ەلشىلەرىن ەلدەن قۋىپ جىبەرۋى كەرەك. ەگەر ءبىز ءوزىمىزدى سىيلاي الماساق بىرەۋدى قالاي سىيلاتپاقپىز؟ سونداي- اق، ارمەنيا سىرتقى ىستەر ءمينيستىرلىگى  ۇ ق ك ۇ- عا مۇشە بولۋ ماسەلەسىن دە قايتا قاراۋى ءتيىس. مۇنداي مەملەكەتتەرمەن سەرىكتەس بولعانشا مۇلدەم جالعىز بولعان ءجون. ءبىز ءبىر نارسەنى ۇعىپ الۋىمىز كەرەك، ارمەنيانىڭ سەرىكتەسى تەك ءوز اسكەرىمىز بەن حالقىمىز عانا بولا الادى. وعان قازاقستان مەن بەلارۋس، ءتىپتى، رەسەيدىڭ ارەكەتى دالەل بولا الادى»، - دەيدى تيەۆوس ارشاكيان ەسىمدى ارميان بەلسەندىسى ءوزىنىڭ Facebook-تەگى پاراقشاسىندا.

ونىڭ پىكىرىنشە، ۇ ق ك ۇ اياسىنداعى ارمەنيانىڭ سەرىكتەستەرى ارقادان پىشاق ۇرىپ وتىر.

ەستەرىڭىزگە سالايىق، 2 - ءساۋىر كۇنى تاۋلى قاراباقتا ءازىربايجان مەن ارمەنيا اسكەريلەرىنىڭ اراسىندا قارۋلى قاقتىعىس باستالىپ، ول ءالى كۇنگە دەيىن جالعاسىپ جاتىر. قازا تاپقانداردىڭ ناقتى سانى بەلگىسىز، قوس تاراپ تا قارسىلاستارىن جۇزدەپ ولتىرگەندەرىن ايتۋدا.

دەرەككوز: Nur.kz