الەمگە ايگىلى تۇلعالار اقشاسىن قايدا جاسىرعانى بەلگىلى بولدى

استانا. قازاقپارات - الەمگە ايگىلى تۇلعالاردىڭ وففشورلىق شوتتارى تۋرالى اقپارات كوپشىلىككە تارادى دەپ حابارلايدى «ك ت ك» ارناسى.

قۇپيا شوتتارى بەلگىلى بولىپ قالعاندار اراسىندا مەملەكەت باسشىلارى، ءىرى بيزنەسمەندەر، گولليۆۋد جۇلدىزدارى مەن اتاقتى سپورتشىلار بار. اقپارات پانامالىق Mossack Fonseca وففشورلىق كومپانياسىنىڭ قۇجاتتارى جۋرناليستەر قولىنا تۇسكەن سوڭ تاراپ كەتكەن.

مالىمەتتەرگە قاراعاندا، وسى فيرما قىزمەتىنە پۋتيننىڭ جاقىن سەرىكتەرى، ۋكراينا باسشىسى پەتر پوروشەنكو، ساۋد ارابياسى كورولىنىڭ وتباسى، ءازىربايجان پرەزيدەنتى يلحام اليەۆتىڭ بالالارى جانە قىتاي ورتالىق كومپارتياسىنىڭ مۇشەلەرى جۇگىنگەن. بارلىعى قارجىنىڭ زاڭسىز اينالىمىن ۇيىمداستىرىپ، جاسىرىن شوتتارعا قوماقتى سومانى سالىپتى.

ماسەلەن پۋتيننىڭ جاقىن دوسى ۆيولونچەليست سەرگەي رولدۋگين ميلليارد دوللاردان اساتىن وففشورلىق توپتىڭ وپەراتورى دەپ كورسەتىلىپتى قۇجاتتا. ال قارجىنى رەسەيدىڭ كاسىپكەرلەرى اۋدارىپ وتىرعان.

سونىمەن قاتار اقشاسىن ەل كوزىنەن جاسىرعاندار تىزىمىندە فۋتبوليست ليونەل مەسسي، اكتەر دجەكي چان مەن ف ي ف ا- نىڭ شەندىلەرى بار. ازىرشە جاريالانعان تىزىمدە قازاقستاندىقتاردىڭ ەسىمى تابىلا قويعان جوق.