قاراقات ءابىلديناعا كونسەرت كەزىندە كويلەگى سىيماي قالدى

استانا. قازاقپارات - ءانشى قاراقات ءابىلدينا جولداسى ءقىدىرالى بولمانوۆ ەكەۋىنىڭ الماتىدا وتكەن جەكە كونسەرتى كەزىندە بولعان شىتىرمان وقيعا جايلى ايتىپ بەردى.

بۇل تۋرالى ول ينستاگرامداعى جەكە پاراقشاسىندا باياندادى، - دەپ جازادى baistars.kz.

الماتى اكىمشىلىگى ەكى ونەرپازدىڭ شىعارماشىلىق كونسەرتىن الماتى قالاسىنىڭ تۋعان كۇنىنە وراي كەلتىرگەندىكتەن دايىندىققا بار-جوعى 17 كۇن بەرىلىپتى. سوندىقتان اياق-استى دايىندالعان كەش شىتىرمانسىز وتپەگەن.

«كونسەرتتىڭ بارىسىندا نەشە ءتۇرلى قىزىقتار بولىپ جاتادى عوي، «مەنى قۇرتقان كوك شولاق» دەمەكشى، مەنى قۇرتقان كوك كويلەكتىڭ قىزىعىمەن بولىسكىم كەلىپ تۇر» - دەپ جازدى قاراقات ءابىلدينا.

«12 كيلوگرام سالماعى بار بۇل كويلەكتى بەلگىلى ديزاينەر نايل بايكۋچۋكوۆ بىردە ءبىر شاقتاپ كورۋسىز بىشكەكتەن كونسەرتتىڭ باستالۋىنا 15 اق مينۋت قالعاندا اكەلگەندە جانە ونىڭ 2 رازمەرگە ۇلكەن ەكەنىن بىلگەندە ءبىر شوك السام، كونسەرتتىڭ بارىسىندا كويلەك اۋىستىراتىن كەزدە مۇلدەم كيىلمەي دەنەمە جابىسىپ قالعاندا ەكىنشى رەت شوك الدىم». تىعىرىقتان شىعۋعا كەش جۇرگىزۋشىسى تۇرسىنبەك قاباتوۆ كومەكتەسىپتى. «قىدەكەڭنىڭ ءانى اياقتالدى، ەندى سەناريي بويىنشا مەن شىعۋىم كەرەك ەدى، مەن ساحنا سىرتىندا كوك كويلەكپەن الىسۋمەن بولدىم. وسى كەزدە تۇرسىنبەككە راقمەت، ساحناعا شىعىپ، سەناريدەن تىس قىدەكەڭمەن اڭگىمە جۇرگىزىپ، بىلدىرمەي جىبەردى» - دەيدى قاراقات.

بەلگىلى ديزاينەردىڭ كويلەگىن قاراقاتقا كيگىزۋگە 10 قىز كومەكتەسىپتى. ءبىراق ىڭعايسىز كيىلگەندىكتەن ساحنادا ءوزىن ەركىن ۇستاي الماعان كورىنەدى. «زالعا ءتۇسۋىمىز كەرەك بولاتىن، وعان شىنىمدى ايتسام، زالعا تۇسپەك تۇگىلى ساحنادا ارەڭ قوزعالدىم. وسىنداي قولايسىز جاعدايدى كوزى قىراعى كورەرمەننىڭ ءبىرازى بايقاپ قويعان سياقتى» - دەي كەلە ءانشى ونەر ادامدارىنىڭ ءومىرى وسىعان ۇقساس جاعدايلارمەن-اق قىزىق ەكەنىن ايتتى.