اقمولا وبلىسىندا جاڭا ۇيدەن باس تارتقان كالاچي تۇرعىندارىنىڭ پاتەرلەرى جەتىم بالالارعا بەرىلەدى

كوكشەتاۋ. قازاقپارات - قونىس اۋدارۋدان باس تارتقان كالاچي اۋىلىنىڭ تۇرعىندارى ءۇشىن ەسىل قالاسىنان سالىنعان ۇيلەر جەتىم بالالارعا بەرىلمەك.

بۇگىن ورتالىق كوممۋنيكاتسيالار قىزمەتىنىڭ اقمولا وبلىستىق فيليالىندا وتكەن باسپا ءسوز ءماسليحاتىندا اتالعان ءوڭىردىڭ اكىمى سەرگەي كۋلاگين وسىلاي ءمالىم ەتتى.

«بارشالارىڭىز بىلەسىزدەر، ەسىل اۋدانىنداعى ەسىل قالاسى مەن جارقايىڭ اۋدانىنداعى دەرجاۆين قالاسىندا كالاچي اۋىلى مەن كراسنوگور كەنتى تۇرعىندارى ءۇشىن ۇيلەر سالىندى. تۇرعىندار باسپانادان باس تارتقان جاعدايدا، پاتەرلەر جەتىم بالالارعا بەرىلەدى»، - دەدى س. كۋلاگين.

ونىڭ سوزىنە قاراعاندا، وبلىستا بالالار ۇيلەرىندەگى جەتىمدەردىڭ سانى قىسقارىپ كەلەدى. سوڭعى 7 جىلدا اتالعان ۇيىمدارداعى بالالار سانى 947 دەن 374 كە دەيىن ازايدى.

«بالالار ۇيلەرىنىڭ ماتەريالدىق بازاسى ءتيىستى دەڭگەيدە ەمەس. بىلتىر اقكول بالالار ۇيىنە قاجەتتى جۇمىستاردى باستادىق. بۇل شاراعا وبلىستىق بيۋدجەتتەن 800 ميلليون تەڭگەدەن استام قارجى ءبولىندى. بيىل وسى نىسانداعى جوندەۋ جۇمىستارىن اياقتاپ، كەزەڭ- كەزەڭمەن باسقا دا بالالار ۇيلەرىندە جوندەۋ جۇمىستارىن جالعاستىرامىز. 2017 -جىلعا ساندىقتاۋ بالالار ۇيىندە تولىق جوندەۋ جۇمىستارى جوسپارلانعان، سونداي-اق 2018 -جىلى ەسىل بالالار ۇيىندە ءتيىستى جۇمىستار جۇرگىزىلەدى»، - دەدى ول.

ونىڭ سوزىنشە، سوڭعى 5 جىلدا جەتىم بالالار مەن اتا- اناسىنىڭ قامقورلىعىنسىز قالعاندارعا 170 پاتەر ءبولىندى. الايدا، كەزەكتە تاعى دا 1758 جەتىم بالا تۇر.

«بيىل اتالعان ساناتتاعى بالالارعا 100 دەن استام پاتەر بەرىلەدى. ناقتى اتاپ وتەتىن بولساق، كوكشەتاۋدا -45، ستەپنوگوردا - 18، ەسىل اۋدانىندا - 10، سەلينوگراد اۋدانىندا - 15، بۋراباي اۋدانىندا -6، جارقايىڭ اۋدانىندا - 4، ەرەيمەنتاۋ اۋدانىندا - 7 پاتەر قاراستىرىلعان، سونداي-اق باسقا اۋدانداردا 2-3 پاتەردەن بولىنەدى»، - دەدى س. كۋلاگين.

اۆتور: رۋسلان عابباسوۆ