استانادا ساياجاي نەمەسە كەڭسەگە ازاماتتاردى تىركەۋگە تىيىم سالۋ ۇسىنىلدى

استانا. قازاقپارات - بۇگىن ەلوردا اكىمدىگىندە وتكەن اپپارات وتىرىسىندا حالىقتى تىركەۋ جانە ەسەپكە الۋدى جەتىلدىرۋ ماسەلەسى تالقىلاندى،

 دەپ حابارلادى قالالىق اكىمدىكتىڭ باسپا ءسوز قىزمەتىنەن.

استانادا كوشى- قون پوليسياسىنىڭ قىزمەتىن رەتتەيتىن ارنايى ەرەجەلەر بەكىتىلۋى مۇمكىن. ەلوردا اكىمدىگىنىڭ اپپارات وتىرىسىندا تۇرعىن ۇيدە ءبىر ادامعا ەسەپتەلگەن بەلگىلى ءبىر شارشى مەترلەر بولعان جاعدايدا عانا ازاماتتاردى تىركەۋ، سونداي- اق، تۇرۋعا ارنالماعان ورىنجايلاردا (مىسالى، ساياجاي نەمەسە كەڭسە) تىركەۋگە تىيىم سالۋ ۇسىنىلدى.

بارلىق استانالاردا كەڭىنەن تاراعان ماسەلەلەردىڭ ءبىرى - ازاماتتاردىڭ تىركەۋسىز جانە ەسەپكە الىنباي تۇرۋى، سونىمەن قاتار، ازاماتتاردىڭ باقىلانبايتىن ىشكى كوشىپ- قونۋى بولىپ تابىلادى.

 استانادا شەكتەۋ شارالارىنىڭ بولماۋى جەكەلەگەن ءۇي يەلەرىنە ءبىر مەكەن جاي بويىنشا، شىن مانىندە وندا تۇرمايتىن ونداعان جانە جۇزدەگەن ادامدى تىركەۋگە مۇمكىندىك بەرەدى. قالادا كەيبىر پاتەرلەردە 400-دەن استام ازامات تىركەلگەن جاعدايلار دا بولدى، بۇل رەتتە ءبىر پاتەرگە 100-200 ادام تىركەلۋ كەڭىنەن تاراعان قۇبىلىس. كوپتەگەن پاتەر يەلەرى وسىلايشا اقشا تاۋىپ كەلەدى، الايدا ولار ءتىپتى اكىمشىلىك ايىپپۇل تولەگەننەن كەيىن دە ادامداردى تىركەۋدى توقتاتپايدى.

«تۇتاستاي ءبىر كولەڭكەلى يندۋستريا جۇمىس ىستەۋدە. بۇل تارتىپسىزدىككە زاڭ جۇزىندە رەتتەلمەۋى ىقپال ەتەدى» ، - دەدى استانا اكىمى ءا. جاقسىبەكوۆ. ەلوردا باسشىسى ءتيىستى مەملەكەتتىك ورگاندارمەن وسى ماسەلەنى قاراۋدى جانە «استانانىڭ مارتەبەسى تۋرالى» زاڭعا تولىقتىرۋلار مەن وزگەرتۋلەر ەنگىزۋ بويىنشا ءتيىستى ۇسىنىستار ەنگىزۋدى تاپسىردى.