قالماقتاردىڭ قۇدايىن تەپكەن داعىستاندىق بالۋان تىزەرلەپ ءتۇرىپ كەشىرىم سۇرادى
وقيعا 2- ءساۋىر كۇنى كالمىكيا ورتالىعى ەليستا قالاسىندا ورىن العان. داعىستاندىق سپورتشى ەركىن كۇرەستەن گورودوۆيكوۆ اتىنداعى تۋرنيرگە قاتىسۋ ءۇشىن كەلگەن ەكەن.
Рен-ТВ تەلەارناسى مالىمدەگەندەي، 22 جاستاعى سپورتشى جارىستان تىس ۋاقىتتا دوستارىمەن بىرگە قالانى ارالاپ، بۋدديستەردىڭ حرامىنا كىرگەن. مۇندا ول ەسكەرتكىشكە دارەت سىندىرىپ، كەيىن تاستان جاسالعان پۇتتىڭ تۇمسىعىنان تەۋىپتى.
ال، بۇل ءساتتى سەرىكتەرى بەينەكامەراعا ءتۇسىرىپ العان. ارتىنشا، اتالعان ۆيدەوروليك الەۋمەتتىك جەلىلەردە تەز تاراپ، جەرگىلىكتى تۇرعىنداردىڭ اشۋ-ىزاسىن تۋعىزدى.
بەينەروليكتى كورگەن ەليستا تۇرعىندارى داعىستاندىق سپورتشىلار ورنالاسقان قوناق ۇيگە كەلىپ، ۆاندالدىڭ جازاسىن وزدەرى بەرمەك بولعان. جاعدايدىڭ ۋشىعۋىنان قورىققان كىنالى جىگىت نارازى توپتىڭ دەگەنىنە كونىپ، تىزەرلەپ بۋددادان كەشىرىم سۇراپتى. كەيىن اراعا پوليتسەيلەر ءتۇسىپ، اۆار پالۋانىن ۋاقىتشا قاماپ تاستادى.
وسى وقيعادان كەيىن ەركىن كۇرەستەن جىلدا وتەتىن ءداستۇرلى تۋرنيردى ۇيىمداستىرۋشىلار توقتاتىپ تاستادى. ال، داعىستاننىڭ سپورت ءمينيسترى ماگومەد ماگومەدوۆ سوگىس الىپ قۇتىلدى.
