ا. ساتايەۆتىڭ «اناعا اپارار جول» كارتيناسىنىڭ تانىسترىلىمى شىقتى - كەسكىن

استانا. قازاقپارات - جەلىدە اقان ساتايەۆتىڭ «اناعا اپارار جول» («دوروگا ك ماتەري») كينوكارتيناسىنىڭ ترەيلەرى پايدا بولدى.

سيۋجەتتىك جەلىسىنە ۇلىنىڭ باسىنا تۇسكەن سىناقتاردان وتۋىنە كومەكتەسەتىن انا ماحابباتىنىڭ كۇشى تۋرالى وقيعا وزەك بولعان. باستى كەيىپكەر ءىلياس (ءادىل احمەتوۆ) پەن اناسىنىڭ (التىناي نوگەربەك) اراسىنداعى ۇلى سەزىم ولاردىڭ باسىنا تۋعان بارلىق قيىن كۇندەردى ارتقا تاستاپ، قايتا قاۋىشۋىنا سەبەپشى بولادى، دەپ جازادى kinostan.kz.

فيلم 1930-جىلدان باستاپ قازىرگە دەيىن ارالىقتى قامتيدى. مۇندا حالىقتىڭ باسىنان وتكەن قيىن-قىستاۋ كەزەڭدەر (ۇجىمداستىرۋ، جۇت، سوعىس جىلدارى) باستى كەيىپكەرلەردىڭ تۇرمىس-تىرشىلىگى ارقىلى بەرىلىپ وتىرادى. كارتيناعا جالپى سانى 2 مىڭنان استام ادام قاتىسقان. نەگىزگى رولدەردى ءادىل احمەتوۆ، التىناي نوگەربەك، ارۋجان جازىلبەكوۆا، بولات ءابدىلمانوۆ، بەرىك ايتجانوۆ، ازامات ساتىبالدى، ەركەبۇلان دايىروۆ، اسىلبەك بورانباي سومدايدى.

«اناعا اپارار جولدىڭ» باس پروديۋسەرى - ءاليا نازاربايەۆا. ال سەناريدى بۇدان بۇرىن دا ساتايەۆپەن بىرگە بىرنەشە كارتينادا جۇمىس ىستەگەن تيمۋر جاقسىلىقوۆ جازعان. تۋىندىنى اۋەنمەن ارلەگەن - كومپوزيتور رينات عايسين.

تاريحي درامانىڭ ءتۇسىرىلىم جۇمىستارى قازاقستاندا، بەلارۋستە جانە ازەربايجاندا جۇرگىزىلدى.

ەسكە سالا كەتەلىك، «اناعا اپارار جول» كارتيناسىنىڭ الدىن الا كورسەتىلىمى «العىس ايتۋ كۇنى» مەيرامىنا وراي، 2016-جىلى 1- ناۋرىزدا ەلباسى نۇرسۇلتان نازاربايەۆتىڭ قاتىسۋىمەن استانا قالاسىندا ءوتتى.