استانا اۋەجايىندا قىتايداعى بوكستان ەلگە ولجالى ورالعان سپورتشىلاردى جەرلەستەرى كۇتىپ الدى - فوتو
«جالپى العاندا قازاقستاندا 11 بوكس جولداماسى بار، ءبىزدىڭ ەرلەر قۇرامامىز وليمپياداعا تۇڭعىش رەت بارلىق سالماق ساناتى بويىنشا قاتىسادى»، - دەلىنگەن حابارلامادا.
ابىلايحان ءجۇسىپوۆ ريوعا جولداما الۋمەن قاتار، تۋرنيردىڭ التىن جۇلدەگەرى اتاندى، بۇل ونىڭ ەرەسەكتەر كومانداسى قۇرامىندا العاش رەت سايىسقا قاتىسۋى.
- بەس ۇرىس جۇرگىزدىم، قارسىلاستار دا كىلەڭ مىقتىلار بولدى. العاشقى ۇرىستا ازداپ تولقىدىم، ويتكەنى دەڭگەي باسقا. ودان كەيىن شيراپ كەتتىم. ۇرىستاردىڭ ءبارى دە اۋىر بولدى. ەڭ كۇردەلىسى كورەيلىكپەن ەكىنشى ۇرىس بولدى، ول تۋرنيردە ءبىرىنشى بولىپ تۇرعان ەدى. بارلىعى دا ءساتتى اياقتالدى، ءبىز جوسپاردى ورىندادىق، - دەدى ا. ءجۇسىپوۆ.
تۋرنيردىڭ التىن جۇلدەگەرى يۆان دىچكو دا ءوز ويىن بىلايشا ءبىلدىردى:
- ازيادا بوكسشىلار ءوسىپ كەلە جاتقانىن كوردىم، تاجىريبە جيناپ، تەحنيكانى دا، تاكتيكانى دا مەڭگەرۋدە. جارتىلاي فينالدا قيىن بولدى، مەن قارسىلاسىممەن ءبىراز اۋرەلەندىم. ال فينال جاقسى ءوتتى. جولدامالاردىڭ تولىق جيىنتىعىن الۋ - بۇل جاقسى، ەندى وسى جەتىستىكتى ۇستاي ءبىلۋىمىز، وليمپياداعا جاقسى ازىرلىكپەن بارۋىمىز قاجەت.
كوماندانىنىڭ اعا جاتتىقتىرۋشىسى نۇرعالي سافيۋللين كوماندا دوحاداعى الەم چەمپيوناتىنداعى ساتسىزدىكتەرىنەن كەيىن قايتادان ساباسىنا ءتۇستى، دەپ سانايدى.
قۇرامانىڭ باس جاتتىقتىرۋشىسى مىرزاعالي ايتجانوۆ ريوعا دەيىن بىردە-ءبىر كۇندى بوس جىبەرمەۋ قاجەتتىگىن ايتادى. «وليمپياداعا ازىرلىك جوسپارى اركىمدە بولەك. ارينە، كەمشلىكتەرىمىزدى ايقىنداپ، سونى جويۋدى قاراۋعا ءتيىسپىز. بىرلەسكەن جيىندار دا وتكىزەتىن بولامىز، سەرگەكتىكتى ساقتاۋ ءۇشىن بىرنەشە حالىقارالىق تۋرنيرلەرگە دە قاتىسامىز. كەلەسى جيىن 10- ساۋىردە وتەدى»، - دەدى ول.
